नेपाली हास्यव्यङ्ग्य अनलाइन पत्रिका

चिना नबनाईकन
कर्मकाण्ड जुराई दिने
राजनीतिको खुबी हुन्छ
आश्वासनको खेतिबाडी
गर्दा गर्दै बुढो हुन्छ ।

सिधासादा जनतासँग
गहिरो नाता गाँसि दिन्छ
बाढी आए बागमतीमा
तिनैलाई बगाई दिन्छ ।

बोली पनि चिप्लो हुन्छ
हेराई पनि तिखो हुन्छ
जनताको नाम बेच्दै
देश लुट्ने बानी हुन्छ ।

अवसरको खेती गर्दै
धर्म पनि बेचि दिन्छ
मौका मिले माथि चढ्न
आफ्नै साथी बलि दिन्छ ।

यदाकदा इमानदारलाई
चोके पारि ङ्याकी दिन्छ
गुटैगुटको खेल खेल्दै
कुर्ची पनि पड्काई दिन्छ ।

बिना चिनाको साईत हेर्दै
विद्रोह पनि मच्चाई दिन्छ
ज्वाला बनि दन्क्यो भने
बालुवा छर्की निभाई दिन्छ ।

लेखाजोखा गर्दा गर्दै
चारै दिशा भौतारिन्छ
स्वदेशको माया भन्दा
विदेशको सेवा गर्छ ।
काठमाडौं