नेपाली हास्यव्यङ्ग्य अनलाइन पत्रिका

बसमा चढ्दा
तरुनीहरू भन्थे
दाइ आलिक सर्नु त
ठिठाहरू भन्थे
दाइ यसो गर्नु त
अधबैँसेहरू भने
भाइ यता हेर्नुस् त
आज भोलि
तरुनी त के
अधबैँसे पनि
अङ्कल पो भन्छन्
चालिस नाघेका पनि
भाइ बहिनी बन्छन्
गाला चाउरी परे पनि
खास उमेर गाको छैन
तिमीले सोच्या जस्तो
म त बुढो भाको छैन ।

पुस्तकालयमा पढ्दा होस् कि
टेम्पोमा चढ्दा
अब त झन
हजुर बा पो भन्न थाले
आफूलाई भर्खरकै लाग्छ
तर यिनले बुढ्यौलीमा पो हाले ।

आफूलाई तन्नेरी लागेको बेला
हजुर बा पो भन्छन्
तिस वर्ष नाघेका नखरमाउली पनि
सोर्ह वर्षे बन्छन्
यो सेतो कपाल पनि
जवानी मै फुल्या हो
जौ तिले दाह्री पनि
उहिले नै झुल्या हो
कपाल फुले पनि
दाह्री फुले पनि
खास उमेर त गाको छैन
तिमीले सोच्या जस्तो
म त बुढो भाको छैन ।

दाह्री सक्कली हुन्
आँखीभौँ सक्कली हुन्
तपाईंलाई खुसुक्क भन्छु
यी दाँत चाहिँ नक्कली हुन
भर्खर साठी काटियो
उमेर त खास गाको छैन
तर तपाईंले भनेको जस्तो
खास बुढो भाको छैन ।
दाङ, हाल– काठमाडौं