नेपाली हास्यव्यङ्ग्य अनलाइन पत्रिका

राष्ट्रवाद गीतमा गाउँला, युवाशक्ति विदेशमा पठाउँला ।
विदेशीले छोराछोरी जन्माउनै छोडे ।
किन पाउनू दुख गरी नेपाल छँदै छ रे ।।
गर्भैदेखि अङ्ग्रेजीको अभ्यास गर्दै गर ।
रुने, हाँस्ने, खाने, सुत्ने अङ्ग्रेजीकै भर ।।
पाऊ आमा सकेका सन्तान, विदेशमा कामदार बनाउन ।।

सिरु फुल्छ आजभोलि मकै फल्ने बारी ।
धान झुल्ने खेतमा त वनमारा घारी ।।
खोला मात्रै बगिरह्यो छैन खेतमा कुलो ।
डलरले बाल्नु पर्ने नेपालीको चुल्हो ।।
सिरु फुल्यो गाउँवेसी पाटामा, युवाशक्ति विदेशी माटोमा ।।

राजनीति यसैसँग मौलाउँछ अरे ।
पार्टी हाँक्ने पैसा पनि डलर मै छरे ।।
कारखाना खोल्नु भन्दा पठाउनै जाती ।
राजनीतिक स्थिरता यसैमा छ साथी ।।
गाउँबस्ती निर्जन बनाउँला, संघीयता डलर मै चलाउँला ।।

किन चाहियो छोराछोरी डलर खाए हुन्छ ।
किन चाहियो बाबुआमा डलर पाए हुन्छ ।।
आफ्ना कुरा सबै गल्ती अर्काको चाहिँ राम्रो ।
सबै कुरा फालिसक्यौं के छ बाँकी हाम्रो ।।
गुमिसक्यो भाषा र भेष, छैन सोच्ने बुद्घि र विवेक ।।
धादिङ