नेपाली हास्यव्यङ्ग्य अनलाइन पत्रिका

रणतन्त्र गयो, गणतन्त्र रह्यो
शिरपेच गयो तर मेच रह्यो
बलराम गए छलराम रहे
किन ईश्वर राम हराम भए ?

अवतार बताउ सही ठहरे
मनले भनुँला भज राम हरे
युग ईश्वरका अब स्वर्ग गए
यस मण्डलमा हनुमान रहे ।

बल तागत दम्भ सबै जति छन्
हनुमानसितै नभनुँ कति छन् !
तहका तह औ थरका थर छन्
अनि पुच्छरका पनि पुच्छर छन् ।

हनुमान भएन बने विचरा !
कसरी हुनु राम महान बरा !?
बलवान छ रावण लड्नु पर्यो
मतका शर हुन् बुझ बढ्नु पर्यो ।

अब राम जपेर हुँदैन अरे !
हनुमान जपीकन पार तरे
भगवान भए गतिहीन खडा
हनुमान भएछ बडो तगडा ।

जसको दम जोड र तागतले
नहुने पनि काम हुने छलले
जसरी पनि मालिक मख्ख परोस्
हनुमान चरित्र अरू कुन होस् ??

म, उनी र तपाइँ सबै स्थलका
विनसित्ति समर्थक छौँ दलका !!
दल नै हनुमान बनी रहँदा
अति कष्ट भएछ सबै सहँदा ।

अधिकार कहाँ छ कुरै नगरौँ
अतिचार यहाँ छ वयान गरौँ
गणतन्त्रविषे नवमन्त्र थपौँ–
‘हनुमान भजौँ, हनुमान जपौँ ।’

बम्घा, गुल्मी