नेपाली हास्यव्यङ्ग्य अनलाइन पत्रिका

डा. गोविन्द केसीको छैटौँ अनशन पनि सरकारसँगको छैटौँ सम्झौतापछि तोडियो । छैटौँ सम्झौताबाट त्रस्त केही निजी क्षेत्रका मेडिकल कलेज सञ्चालकहरू भने सम्झौताविरुद्ध आन्दोलनमा उत्रिएको कुरा सुनिँदै छ । सरहरूलाई आन्दोलनमा गइराख्ने दुख गर्नु पर्दैन भनेर सम्झाउनुपर्ने भो । ६ महिनापछि वा अझ छिट्टै डा. केसीको सातौँ अनशन हुनेछ । उनका मागहरू पहिलो, दोस्रो, तेस्रो, चौथो, पाँचौँ र छैटौँ अनशनका जस्तै वा केही थपथाप हुनेछन् ।

सातौँ अनशनमा पनि उनले सुरुमा सरकारसमक्ष मागहरू राख्नेछन् र माग पूरा नभए अनशन बस्ने चेतावनी दिनेछन् । सरकारले उनी अनशन बस्ने कुरा नपत्याउने त कुरै भएन तर यिनको कुरा एक कानले सुनेर अर्को कानले उडाउनेछ । केही दिनमै उनी शिक्षण अस्पतालको एउटा बेडमा ओछ्यान लगाएर बर्लङ्गै पल्टिनेछन् । उनका समर्थकहरू ‘सर अघि बढ्नोस्, साथ दिने हामी छौँ’ भन्दै उसै गरी वरिपरि झुम्मिनेछन् । सरकारले सञ्चार माध्यमबाट उनलाई अनशन तोड्न आग्रह गर्नेछ । उनले पनि एक कानले सुनेर अर्कोले उडाउनेछन् । बरू ज्यानै जाओस् तर सरकारलाई नझुकाई उनी उठ्ने छैनन् । १०, १२ दिन भएपछि उनको स्वास्थ्य गम्भीर भएको भनेर पत्रपत्रिका, टेलिभिजन वा रेडियोहरूले भनेपछि र मानव अधिकारकर्मीहरू पनि सक्रिय भएपछि सरकारले उनीसँग वार्ता गर्न कुनै मन्त्रीलाई पठाउनेछन् । धोकेवाज सरकारका मन्त्रीतिर डा. केसीले फर्केर पनि हेर्ने छैनन् । त्यसमा पनि आफूले राजीनामा मागेका मन्त्री नै वार्ता गर्न भन्दै आउँदा कति रिस उठ्ला !

डा. केसीको अवस्था जीवन र मृत्युको दोसाँधमा पुगेको समाचार आउन थालेपछि सरकारले केसीलाई मनपर्ने अधिकारीहरू सम्मिलित टोली गठन गरेर वार्ताका लागि पठाउनेछ । एउटा सिंगै राज्य एकातिर, एक जना डाक्टर एक्लै अर्कातिर । तर पनि डाक्टर नै भारी । ल हेर्नूस्, कति शक्तिशाली डाक्टर, कति निरीह सरकार, हाम्रो नेपालमा ।

टोलीले डा. केसीलाई बिन्तीभाउ गर्नेछ । पटक–पटक धोका खाएका उनले बिन्ती किन सुन्थे, पहिला पहिलाजस्तै लिखित रूपमा माग पूरा नगरी हलचल नगर्ने अडान राख्नेछन् । एक–दुईपटक वार्ता विफल भएको समाचार बाहिर आउनेछ । डा केसीले नयाँ र अझै कडा माग थपेर तेस्र्याएपछि बल्ल सरकार आत्तिनेछ । तैपनि, सकभर उनलाई माग पूरा गर्ने आश्वासन दिएरै अनशन तोडाउने प्रयास गरिनेछ । केसी थप क्रुद्ध भएपछि लाचार भएर सरकारले सातौँपटक घुँडा टेक्नेछ र उनका सबै माग पूरा गरेको सम्झौतापत्रमा सहीछाप गर्नेछ । डा. केसीले नेताहरूको भाषा सापटी लिएर तीन करोड जनताको साथ पाएर आफूले विजय हासिल गरेको भन्नेछन् ।

प्रधानमन्त्री सुशील कोइरालाले बारम्बार भन्ने गर्नुभएको ‘विन विन’को अवस्था भनेको यही रहेछ । एक पक्षले सरकारलाई झुकाउनु छ, झुकाएकै छ । अर्को पक्षलाई अनशन तोडाउनु छ, तोडाएकै छ । यी काम परम्परागत रूपमा यसरी नै सम्पन्न हुँदै आएका छन् । सातौँपटक नहुने कुरै छैन । त्यसैले माथेमा प्रतिवेदन लागू होला भनेर आत्तिएका सरहरू ढुक्क भए हुन्छ । माथेमाहरू कराइरहन्छन् । प्रतिवेदनहरू हराइरहन्छन् । केसी रोइरहन्छन् । माफियाहरू हाँसिरहन्छन् । अनशन चलिरहन्छ । सम्झौताहरू भइरहन्छन् । काग कराइरहन्छ । पिना सुकिरहन्छ । हाम्रो नेपालमा ।

नेपाल, भाद्र ३१, २०७२