नेपाली हास्यव्यङ्ग्य अनलाइन पत्रिका

के ढाँट्नु यस्तो पनि सत्य बोल्छु
लुकाउने के र रहस्य खोल्छु
हो, चाहना हुन्छ बसूँ म खालि
सभा समारोह जहाँ छ ताली ।।

पछाडि पुग्दा पनि अग्रभाग
पुगे अगाडि अघि नै विभाग
बसूँ सभाका बिच ठाँट साथ
मञ्चस्थ आफ्नो मनभित्र आस ।।

मञ्चस्थको जीवन भाग्यमानी
अगाडि बस्दा सबको सिरानी
छेलिन्न कोही सजिलो बसाइ
माला कतै आसन साथ पाई ।।

चटक्क दौरा सुरुवाल फेरी
टाई र टोपी अनुहार हेरी
सम्मान पाईकन बस्न पाए
आनन्द हुन्थ्यो मन यो रसाए ।।

टिभी समाचार कतै बनाए
वेला कहाँ हेर्दछु बस्न पाए
चाहिन्न केही अघि बस्न देऊ
बसिन्न है दर्शक साथ छेउ ।।

वेला बितोस् छैन कुनै निराशा
चाहिन्न भाडा पनि छैन आशा
बोल्नै परे बोल्दछु बोल्न मात्र
मञ्चस्थ बन्ने मन एक मात्र ।।

सकिन्छ खाजा बरु लोभ छैन
के भोक तिर्खा तन मोह छैन
मुसुक्क हाँस्दै अघि बस्न पाए
चिया चिसो के मन यो रमाए ! ।।

काठमाडौं