नेपाली हास्यव्यङ्ग्य अनलाइन पत्रिका

यता अघोरी बाबा
उता मुसलन्डे बाबा
दुबैका उस्तै लटा
उस्तै दारी उस्तै जटा
दुबैका पाखुरा अर्नाका सिङ जस्ता
तिघ्रा, खम्बा रोटे पिङका जस्ता ।

मान्छेहरू
अघोरी बाबासँग डराउँछन्
सराप देला कि भनी
मान्छेहरू
मुसलन्डे बाबासँग पनि डराउँछन्
बदला लेला कि भनी ।

अघोरीमा भिड छ
ग्रह दशा हटाइ देला कि भनी
मुसलन्डेकोमा पनि भिड छ
समस्या कटाइ देला कि भनी ।

नेताहरू
अघोरिकोमा आउँछन्
मन्त्री बनाइ देला कि भनी
नेताहरू
मुसलन्डेकोमा पनि आउँछन्
चुनाव जिताइ देला कि भनी ।

मान्छेहरू भन्छन्
अघोरीका हातले धेरै मन्त्री भाका छन्
मान्छेहरू भन्छन्
मुसलन्डेको साथले धेरै सभासद भाका छन्
अघोरी र मुसलन्डे बाबा
धेरै समान भए पनि केही फरक छन्
बोल्दा नरम देखिए पनि भित्र दुबै कडक छन् ।

एउटाले चिम्टा झट्काउँछ
अर्कोले पिस्तोल पट्काउँछ
तर दुबैसँग गएपछि
दुबैले मान्छेलाई, ग्राहक बनाई लट्काउँछ ।

दाङ, हाल : काठमाडौं