नेपाली हास्यव्यङ्ग्य अनलाइन पत्रिका

कुकुरहरू
कुकुर जस्तै हुन्छन्
मान्छे भन्दा फरक भिन्नै स्वरुपका ।
हिमाल, पहाड,तराई, उपत्यका
जताततै भेटिन्छन् कुकुरहरू
रङ कालो सेतो रातो जस्तो सुकै होस्
आकार अग्लो होचो मोटो ख्याउटे जस्तो होस्
विचारको कद एउटै हुन्छ तिनको
बिमर्शको दायरा उस्तै साँघुरो र सांघातिक हुन्छ तिनको
फकाएर घुर्क्याएर धम्क्याएर जसरी होस्
खानु तिनको जीवनकै पहिलो र अन्तिम सपना हो
अर्थात खानकै लागि बाँचेका हुन् यावत् कुकुरहरू ।
भोकको झोंकमा कहिलेकाहीँ
आफ्नै मायालु माली खाइदिन्छन् कुकुरहरू ।
अनौठो कुरा
स्वार्थको चुली जित्नु छ भने
जन्मजात दुश्मन भनिएका
कालो बिरालोसंग पनि मिलिदिन्छन् कुकुरहरू ।
कहिलेकाहीँ
सुरक्षाका नाममा ख्याङ ख्याङ भुकेर
सम्पूर्ण क्लाइमेक्सहरू भत्काउँछन् कुकुरहरू।
कुकुरहरू खान पाए
खुशी भै हाल्छन्
ओछ्यान रछ्यान रहल पहल झुठो
यस्तै यस्तै ।
इमानदारको अलिकति इमान खोस्न सके
अरुको भागको एक टुक्रा सिनो खोस्न सके
कुकुरहरू दिपावली मनाइहाल्छन् ।
भर्खरै
एउटा हड्डी थपिएको दिन
कुकुरहरूले खुब भोज खाएछन् ।

मोरङ