नेपाली हास्यव्यङ्ग्य अनलाइन पत्रिका

जग्गा जमिन धरो थेन खुर्सानीको बारी
अहिले भने डल्लु कपन नैकाप सल्लाघारी {{read_more}}
महिनैपिच्छे विदेश भ्रमण चिल्लो छ सवारी
मेरो पनि नमस्कार है मिस्टर भ्रष्टाचारी ।

हिजोसम्म नामर्द छ भन्थे ज्वाईं छुसी
घुस खान थालेपछि ससुराली खुसी
तिम्रै नै छ मालामाली वारिदेखि पारि
मेरो पनि नमस्कार है मिस्टर भ्रष्टाचारी ।

मधेस पहाड छुट्याउनेको साथ पनि तिमी
राष्ट्रवादी भन्नेहरुको हात पनि तिमी
तिम्रो सँगत सवै पार्टीसंग हाराहारी
मेरो पनि नमस्कार है मिस्टर भ्रष्टाचारी ।

घाम छन्जेल सवैजाना तिम्रै विरोध गर्छन
साँझ फेरि शिखर साँझमा तिम्रैसामु पर्छन
दरबारजस्तै घर जख्यौ बैंक वचत भारी
मेरो पनि नमस्कार है मिस्टर भष्टाचारी ।

तिम्रै प्यारा व्यापारीछन् ठेकेदार नेता
कालो कर्तुत गरे पनि पूँजी बन्छन् सेता
माल अड्डा भन्सार अड्डा सँधै हाराहारी
मेरो पनि नमस्कार है मिस्टर भ्रष्टाचारी ।

गौरादह, झापा