नेपाली हास्यव्यङ्ग्य अनलाइन पत्रिका

विजय सुब्बा :

आखिरमा मान्छे पनि दुष्टहरूको खात रैछ
राजनीति भन्या’पनि तिन्कै लामो हात रैछ

नसोध न जनता हो बेक्कारमा यस्तालाई
सङ्घर्ष त भोकाएका झूटहरूको भात रैछ

छक्क किन साथीभाइ यस्तै त हो काम कुरो
जे जे हुनु छ नि गर्ने यौटै खुराफात रै’छ

काँ छैन र भ्रष्टाचार छैन भन्नु सालाहरू
गर्नेलाई दिनै पनि खुलेआम रात रै’छ

लोकतन्त्र आएपछि यौटा कुरा ज्ञात भयो
राम्रो कुरा गरीगरी गर्नुपर्ने घात रैछ

जसलाई शिर ठानेँ मूल खाँबो भनी मानेँ
त्यो त हरेक मोडैपिच्छे कर्कलाको पात रैछ ।

०००
तेह्रथुम
२३ मङ्सिर २०६१