तीन ठोक्तक
दिमाग स्वदेशी ज्यान परदेशी कहिलेसम्म टिक्ला खै घाँडो भयो विदेशी जीवन मलाई जाउँ कि क्या हो फिरेर ।
नारायण भट्टराई
१. साधुहरू चोर भए चोरहरूको मात्रै भयो राज
गरिवहरूका करङ् देखाई मागिन्छ भोट आज
मानवता जलाइएको भस्मेमाथि रोपियो रे राम
नाङ्गाहरूको साम्राज्यमा अस्तित्व खोज्दैछ लाज ।
२. देश बनाउँछु भन्दै जबर्जस्ती देशका चोक्टा लुछेर खानेले
सरकारी सम्पति लुटेर खुरुखुरु आफ्नै घरमा लानेले
परदेशीले जन्मभूमि सम्झिँदा धारे हात लाउनेहरू
के नै खुत्याएर राष्ट्रवादी हुँ भन्दै देश छोडेर नजानेले ।
३. कमायो तिर्यो कमायो तिर्यो कहिले होला सकिने तिरेर
थैली आफ्नो नभरिँदो रै छ अर्काको सम्पतिमा थुक निलेर
दिमाग स्वदेशी ज्यान परदेशी कहिलेसम्म टिक्ला खै
घाँडो भयो विदेशी जीवन मलाई जाउँ कि क्या हो फिरेर ।
०००
हाल, अमेरिका