नेपाली हास्यव्यङ्ग्य अनलाइन पत्रिका

हृषीकेश बराल :

बढे दुष्ट जन्मी गरे बेइमानी
विदेशी बनाए दिई राहदानी ।
बुढा मात्र बस्छन् युवा कत्ति छैनन्
कुनै रोग लागे सिटामोल दिन्नन् ॥१

लुटाहाहरूकै चलेको छ राज
कहीँ चित्तबुझ्दो छँदै छैन काज ।
सदाचार बिर्सी दुराचार गर्छन्
यही रीत गर्ने बिना काल मर्छन् ॥२

चुसी द्रव्य सारा असाध्यै गनाए
कमाई रमाए दरिद्री बनाए ।
मरी स्वर्ग जाँदा त्यहीँ लान्छु ठानी
सुनै मात्र चोर्ने परेको छ बानी ॥३

भएको प्रतिष्ठा गयो नाम दाम
कहाँ शान्ति मिल्ला हरे कृष्ण राम ।
छ शास्त्रीय वाणी बुझी मान्नुपर्छ
अवज्ञा गरेमा सदा खस्नुपर्छ ॥४

हियारो दुखेरै बगेको छ आँसु
फुटेको छ छाला घटेको छ मासु ।
गिदी पेट हड्डी सधैं पोल्छ मेरो
परी दुर्दशामा भएँ झन् अँधेरो ॥५

भयो बाँच्न गाह्रो कहाँ मर्न जाऊँ
बढेको छ चिन्ता कता यो बताऊँ ।
छ इच्छा धरामा रमाएर बाँच्ने
गल्यो देह पूरै कहाँ के म साँच्ने ॥६

०००
पोखरा -२६ कास्की