नेपाली हास्यव्यङ्ग्य अनलाइन पत्रिका

हृषीकेश बराल :

देव भूमिमा, दैत्य सल्किए
तीर्थ मासिए, भूत पल्किए ।
पुत्र बेच्तछन्, द्रव्य माग्दछन्
मूल्य लासको, खान थाल्दछन् ॥१

कर्मशील हुन्, देशका युवा
राज्य देखियो, बैंस बेचुवा ।
रोजगार खै, छैन देशमा
देश लुट्तछन्, साधु भेषमा ॥२

देशभक्तिको, भाव सिद्धियो
राष्ट्रभक्तिमैं, दुर्दशा भयो ।
सप्रिदैन खै, भ्रष्टको मति
आय राज्यको, सिद्धियो अति ॥३

खान माग्छ जो, मृत्यु पाउँछ
सम्झिँदा दशा, आँसु आउँछ ।
वृद्धको भयो, दाइजो घर
सत्य बोल्नु के, लाग्छ यो डर ॥४

बोल्दछन् कुनै, व्यर्थका कुरा
पुग्दछन् सुती, उच्च टाकुरा ।
मानियो झिँजो, सुन्नु के अब
लाग्दछन् तिनै, जान रौरव ॥५

अस्मिता बँचोस्, देशको भनौँ
धूर्तता घटोस्, भ्रष्टको भनौँ ।
राष्ट्रभक्तिको, प्रार्थना गरौँ
मातृभूमिको, काखमा मरौँ ॥६

०००
पोखरा -२६, कास्की ।