नेपाली हास्यव्यङ्ग्य अनलाइन पत्रिका

अमर सन्तति :

१.
विरोधीलाई अचाउँने कुरा बाटेरै हो
आफ्नो दोष बचाउँने कुरा ढाँटेरै हो
गरौँ भने छैन काम, काट्नै पर्‍यो दिन,
खाएको चीज पचाउँने कुरा काटेरै हो ।

२.
तोप बारुद बम गोलाले भुट्न सकेनथ्यो
एकढिक्का थ्यो स्वाभिमान फुट्न सकेनथ्यो
लुटे आज मेरो देश यहीँका हात्तीछापले,
विश्व लुट्ने साम्राज्यले लुट्न सकेनथ्यो ।

३.
कतै स्वास्थ्य चौकी छैन भ्युटावर बनाउँछ
कतै पढ्ने स्कुल छैन भ्युटावर बनाउँछ
मेरो देशको सरकार पनि लाग्दछ अचम्मको ,
कतै खोला तर्ने पुल छैन, भ्युटावर बनाउँछ ।

४.
पक्षपाती छ भन्दाभन्दै विश्वास गरियो
नजाती छ भन्दाभन्दै विश्वास गरियो
पश्चात्तापले मन पोलेको छ अचेल,
ऊ घाती छ भन्दाभन्दै विश्वास गरियो ।

५.
सधैँभरि अरुलाई ढाँटी छली खानु परोस्
अरुको प्रगतिमा जलीजली जानु परोस्
शुभकामना तिमीजस्तो महान परपीडकलाई,
अन्तिमबेला सारा कष्ट पोको पारी लानुपरोस् ।

०००
रामेछाप, हाल भक्तपुर