नेपाली हास्यव्यङ्ग्य अनलाइन पत्रिका

अमर सन्तति :

१.
तिमी सागर जिन्दगीको म त सानो कुवा
तिमी सिमल जिन्दगीको म त चिम्टी भुवा
तिम्रो ठूलो साम्राज्य छ मेरो कणझैँ अस्तित्व ,
तिमी बादशाह जिन्दगीको म त तिर्की दुवा ।

२.
मूर्खता चर्चित र ज्ञान मौन छ अचेल
पापको साम्राज्य र धर्म मौन छ अचेल
कसलाई विश्वास गर्ने दोधारमा छु म,
झुटको ख्याति र सत्य मौन छ अचेल ।

३.
जताततै कानचिरा ती जोगी भेटिन्छन्
त्यागी छैनन् कोही पनि भोगी भेटिन्छन्
कस्तो स्वार्थी र लुब्धो छ मान्छेको जात ,
सयमा उनान्सय त द्रव्यरोगी भेटिन्छन् ।

४.
देखिँदैछ चारैतिर यहाँ अहो ! राइँदाइँ
चल्दैछ बाघको छालामा स्यालको रजाइँ
हुँदैछ फेरि पीडा पश्चात्ताप आज पनि
दिइएछ नि कस्तो कस्तोलाई कजाइँ !

५.
कोही आश्वासनका पाला बोकेर आउछन्
कोही सोप्निल सुन्दर माला बोकेर आउछन्
सधैँ झुक्याउछन् देश बनाउछु भन्दै हिँड्नेहरूले,
कोही खै किन मुहारको छाला छोपेर आउछन् ।

०००
भक्तपुर