नेपाली हास्यव्यङ्ग्य अनलाइन पत्रिका

अमर सन्तति :

१.
के बोले केको लागि थाहा छैन
कसले घोले विषादि थाहा छैन
खरानीमाथि नाँच्दैछन् तिनीहरू ,
किन पोले जागीजागी थाहा छैन ।

२.
काँडा बनेर मन छुन जानेको छैन
विष ओकल्ने सर्प हुन जानेको छैन
दबाएर पीडा भित्रै पिइदिन्छु म आँसु
तिमीले जस्तै मैँले रुन जानेको छैन ।

३.
न कुनै इज्जत मान मर्यादा न भेष छ
लथालिङ्ग भताभुङ्ग पारामा देश छ
के बोल्छन् के गर्छन् मुख छोप्नेहरुले
खै के होला कहाली लाग्दो परिवेश छ ।

४.
पानीबिना रोपाईँ कसरी हुन्छ महोदय
बाध्यताबिना बसाइँ कसरी हुन्छ महोदय
नाँरिन तम्सेकाछन् नदाइएका बहरहरू
मियोबिना त्यो दाइँ कसरी हुन्छ महोदय ?

०००
भक्तपुर