नेपाली हास्यव्यङ्ग्य अनलाइन पत्रिका

कल्पना अधिकारी भट्टराई :

भेद भाव, यातना नहुन् बुबा मुमाप्रति
चाहना छ के भनी बुझुन् समस्त सन्तति
वेदना भुलून् सबै र आँसु हर्षका बहुन्
स्नेहले हँसाउने बुबामुमा सुखी रहुन्।१।

व्योम बन्दछन् बुबा र मेदिनी मुमा बनी
होमिएर अग्निमा दिए अमोल जीवनी
ज्ञानमूर्ति विश्वका म मान्छु धन्य धन्य हुन्
स्नेहले हँसाउने बुबामुमा सुखी रहुन्।२।

भोकमा र प्यासमा दिएर खान स्वादिलो
रोगमा र शोकमा गरेर ओखतीमुलो
शुद्ध खानपानले शरीर हृष्टपुष्ट हुन्
स्नेहले हँसाउने बुबामुमा सुखी रहुन्।३।

गाउँमा समाजमा जहानमा र देशमा
योगदान गर्दछन् खटेर जो समग्रमा
आजका मनुष्यले अमूल्य त्याग सम्झियून्
स्नेहले हँसाउने बुबामुमा सुखी रहुन्।४।

शब्दपुष्पले कहाँ सकिन्छ गर्न वर्णन।
पाउमा झुकी सदा म गर्छु ढोग वन्दन।
हेपिने र चेपिने कहीँ कतै हुँदै नहुन् ।
स्नेहले हँसाउने बुबामुमा सुखी रहुन्।५।

०००