नेपाली हास्यव्यङ्ग्य अनलाइन पत्रिका

कल्पना अधिकारी :

च्याप्छ अनेकन रोग बढेर
जाँगर मर्दछ शक्ति घटेर
बर्बर बर्बर आँसु बहन्छन्
ज्येष्ठहरू अति कष्ट सहन्छन्। ।१।

डाक्टर भन्दछ वर्जित खान
जीवन बन्दछ लास समान
तैपनि हर्दम संयम हुन्छन्
ज्येष्ठहरू अति कष्ट सहन्छन्। ।१।

आकुलव्याकुल पार्दछ भित्र
दिन्छ र को अब साथ पवित्र
चिन्तित भै सब दर्द कहन्छन्
ज्येष्ठहरू अति कष्ट सहन्छन्।।३।

धूमिल लोचन मन्द छ दृष्टि
कृत्रिम लाग्दछ सुन्दर सृष्टि
विस्मृति बढ्दछ सन्तति भुल्छन्
ज्येष्ठहरू अति कष्ट सहन्छन्।।४।

रूप विरूप छ दाँत झरेर
हेप्दछ जो पनि वृद्ध भनेर
सङ्कट पर्दछ कान न सुन्छन्
ज्येष्ठहरू अति कष्ट सहन्छन्। ।५।

आँगन बन्दछ जो परदेश
काँस फुलेसरि फुल्दछ केश
इन्द्रिय दुर्बल निष्क्रिय हुन्छन्
ज्येष्ठहरू अति कष्ट सहन्छन्।६।

०००
भक्तपुर