नेपाली हास्यव्यङ्ग्य अनलाइन पत्रिका

कल्पना अधिकारी :

छोरी ! माइतमा हुँदा सुख थियो भन्दै नभन्नू तर ।
पार्नू गेह सुरम्य उज्ज्वल तिमी होस् मान्यमा आदर।
चर्को शब्द कतै कुनै समयमा गर्दै नगर्नू तिमी।
माता यी पतिकी मुमा सरह नै हुन् कर्मदाता पनि ।१।

सासूबाट सिकेर कर्म घरको कर्तव्य सम्झी गर।
भावी काम छ के भनेर पहिल्यै सोध्नू भई तत्पर।
राख्नू इज्जत माइती र घरको सद्भाव भर्नू तिमी।
माता यी पतिकी मुमा सरह नै हुन् कर्मदाता पनि।२।

बन्नू नित्य मिजासिली र हँसिली हुन्छन् सबै गद्गद।
राख्नू गेह सधैँ सफा र सुकिलो भद्दा नहोस् लत्पत।
पार्नू नित्य हराभरा सुनहरा पाखो पखेरो जिमी।
माता यी पतिकी मुमा सरह नै हुन् कर्मदाता पनि ।३।

यी मेरै परिवार हुन् यति बुझी मिल्नू सबै साथमा।
अल्छी गर्न कदापि हुन्न तनया, लाग्नू छिटै कर्ममा ।
गर्नू फोन यदाकदा समयमा सम्झेर आमा भनी।
माता यी पतिकी मुमा सरह नै हुन् कर्मदाता पनि।४।

सासू देवर नन्द, साथ ससुरा, आफन्त चिन्नू सबै।
आएमा घर पाहुना हृदयले सम्मान गर्नू सधैँ।
छोरी शिक्षित छौ सिपालु पनि छौ आलोक छर्नू तिमी।
माता यी पतिकी मुमा सरह नै हुन् कर्मदाता पनि ।५।

०००
भक्तपुर