नेपाली हास्यव्यङ्ग्य अनलाइन पत्रिका

कल्पना अधिकारी :

चाहिन्छ राम्रो भावना भित्री छिमेकी साथमा
सम्बन्ध गाढा धारणा राखौँ शुभेच्छा आँतमा
लाचार बन्ने स्वार्थमा फस्ने न आऊन् बाध्यता
भूभाग वैरी ताक्तछन् हाम्रो बचाओैँ अस्मिता।१।

देखेर हाम्रो खस्किँदो चाला बहाना पार्दछन्
तोडेर खम्बा सुस्तरी आफ्नो सिमाना सार्दछन्
हेरेर बस्छौँ लालसा बोकी भने हो मूर्खता
भूभाग वैरी ताक्तछन् हाम्रो बचाओैँ अस्मिता ।२।

सन्तान हामी वीरका नामी छ ठाडो यो शिर
छौँ स्वाभिमानी कर्मले आफ्नै खुलेको तक्दिर
जोगाउने हो के गरी हाम्रो पुरानो सभ्यता
भूभाग वैरी ताक्तछन् हाम्रो बचाओैँ अस्मिता।३।

गाँसेर माला सूत्रमा एकै चिनाओैँ देश यो
भाषा छ बेग्लै उच्च झन् आफ्नै चिनारी भेषको
आत्मीय नाता गाँस्नमा लागौँ न साधौँ शत्रुता
भूभाग वैरी ताक्तछन् हाम्रो बचाओैँ अस्मिता।४।

छन् रत्न खानी सम्पदा दामी हिमाली भेकमा
खाद्यान्न बाली झुल्दछन् चाक्ला तराई फाँटमा
लुट्ने छ आई शत्रुले साँच्चै हराए एकता
भूभाग वैरी ताक्तछन् हाम्रो बचाओैँ अस्मिता।५।

०००
भक्तपुर