नेपाली हास्यव्यङ्ग्य अनलाइन पत्रिका

कल्पना अधिकारी भट्टराई :

विचारको अन्तर हो म मान्दछु
मुमा र सासू म समान ठान्दछु
खुलस्त राख्नू सुविचार साथमा
नसम्झ सासू , किन बन्दिनन् मुमा।१।

बुझेर माया ममता गरेपछि
दुवै जनामा समता भएपछि
हुनेछ शोभा परिवार साथमा
नसम्झ सासू ,किन बन्दिनन् मुमा।२।

मुसुक्क हाँसेर सदैव बोल न
विनम्रता साथ मिठास घोल न
हुँदा विरामी नित छाम माथमा
नसम्झ सासू ,किन बन्दिनन् मुमा।३।

पियाउँछिन् ज्ञान सुधा सकेजति
चिनाउँछिन् जो कुल धर्म संस्कृति
सिकाउँछिन् बाँच्न अभाव भावमा
नसम्झ सासू ,किन बन्दिनन् मुमा।४।

नहेप वृद्धा कमजोर छन् भनी
सुसार गर्नू तनया स्वयं बनी
सजाउँछिन् शीघ्र तिनी हियारमा
नसम्झ सासू ,किन बन्दिनन् मुमा।५।

बनेर लक्ष्मी धनधान्यले भरी।
उघार ढोका मनको सधैँभरि।
महत्त्व बढ्ने छ निकै समाजमा
नसम्झ सासू ,किन बन्दिनन् मुमा।५।

०००
भक्तपुर