नेपाली हास्यव्यङ्ग्य अनलाइन पत्रिका

गाैर, २०८२ कार्तिक २५ । रौतहटका साहित्यकार सञ्जय साह मित्रलाई ५० हजार रुपैयाको अन्तर्राष्ट्रिय पुरस्कार दिइने भएको छ ।

बज्जिका साहित्य समाज सर्लाहीले मित्रलाई नवस्थापित ‘कवि सदानन्द अन्तर्राष्ट्रिय बज्जिकासेवी पुरस्कार’ दिने निर्णय गरेको अध्यक्ष रामचन्द्र महतो कुशवाहाले जानकारी गराएका छन् ।

पुरस्कारका लागि उपयुक्त पात्र चयन गर्न तीन सदस्यीय उपसमिति गठन गरिएको थियो । अध्यक्ष महतोको संयोजकत्वमा विनिताकुमारी साह र श्रीमती गुडीकुमारी साहको तीन सदस्यीय पुरस्कार चयन समितिले मित्रलाई पुरस्कार दिन सिफारिश गरेअनुरुप उक्त पुरस्कार दिने निर्णय गरिएको बताइएको छ ।

बज्जिका भाषा र साहित्यको साथै नेपाली साहित्यको लामो समयदेखि सेवा गरेको भन्दै मित्रलाई ५० हजार रुपैया नगद, सम्मानपत्र र दोसल्ला ओढाएर सम्मानित गरिने अध्यक्ष कुशवाहाको भनाइ छ । बज्जिका र नेपालीमा गरी डेढ दर्जनभन्दा बढी कृति प्रकाशित भइसकेका मित्रले हिन्दी भाषामा पनि साहित्य सिर्जना गरेका छन् । भाषा, साहित्य, संस्कृति, समीक्षा, समालोचना तथा अनुसन्धानका साथै सिर्जनामा कलम चलाइरहेका मित्रको हाइकुदेखि महाकाव्यसम्म प्रकाशित छन् ।

नेपाल सरकारको संस्कृति मन्त्रालयबाट प्रदान गरिने प्रादेशिक प्रतिभा (साहित्य) पुरस्कार प्राप्त गरिसकेका मित्रलाई सर्लाहीकै एउटा संस्थाले यस अघि बज्जिका शिरोमणिको उपाधि पनि दिइसकेको छ ।

यसै गरी ‘कवि सदानन्द अन्तर्राष्ट्रिय बज्जिकासेवी सम्मान’बाट समाजसेवी दीनबन्धु झा, मानव अधिकारकर्मी मुकेशकुमार मिश्र, साहित्यकार संजय महतो राज, विजय यादव निर्बिज, ममता मृदुल, बुद्धवीर लामालाई सम्मानित गरिने भएको छ ।

यसै गरी भारतीय साहित्यकारहरु मणिभूषण प्रसाद सिंह अकेला, सन्तोष चौधरी, हंसलाल साह र हेमा सिंहलाई पनि सम्मानित गरिने भएको अध्यक्ष कुशवाहाले जानकारी गराएका छन् ।
बज्जिका साहित्य समाज सर्लाहीमार्फत पहिलोपटक ठुलो राशीको पुरस्कार स्थापना गरिएको छ । सर्लाहीको विष्णु गाउँपालिकाका सेवा निवृत्त प्रहरी कर्मचारी महानन्द झाले आफ्ना सहोदर दाजु सदानन्द झाको स्मृतिमा पुरस्कार तथा सम्मानको स्थापना गरेका हुन् ।

यसै वर्ष स्थापित पुरस्कार तथा सम्मान मंसिर ६ गते शनिवारका दिन सर्लाही सदरमुकाम मलंगवामा एक कार्यक्रमको आयोजना गरी प्रदान गरिने कुशवाहाले जनाएका छन् ।

कार्यक्रममा नेपाल र भारतका बज्जिका, नेपाली तथा हिन्दी भाषाका साहित्यकारहरुको सहभागिता रहने बताइएको छ ।

‘व्यङ्ग्यम्’ हास्यव्यङ्ग्य निबन्ध सङ्ग्रहका कुशल व्यङ्ग्य शिल्पी सञ्जय विगत लामाे समयदेखि फित्काैली डटकममा कथ्याैली स्तम्भ अन्तर्गत निरन्तर कथात्मक व्यङ्ग्य लेख्दै आउनु भएकाे छ । फित्काैली उहाँप्रति हार्दिक बधाइ ज्ञापन गर्दछ ।

०००