नेपाली हास्यव्यङ्ग्य अनलाइन पत्रिका

कविराज घिमिरे :

लेखुन् यी कविले विपत् यदि भए पाका जहाँ छन् अरू ।
देखुन् वास्तव जे छ वृद्धजनका आफ्ना समस्याहरू ।।
भेटुन् ज्येष्ठ मडारिँदा शिथिल छन् पानी नपाईकन ।
रोक्ने के छ विकल्प मान्य जन हो सोध्दै छ मेरो मन ।।

छैनन् साथ भने कुनै जन यता छोरा बुहारीहरू ।
छोरी नाति र नातिनी पनि गए के काम लाग्लान् अरू ।।
त्यस्ता छौ यदि वृद्ध एकल भने आशा छ बाँच्ने भन।
रोक्ने के छ विकल्प मान्य जन हो सोध्दै छ मेरो मन ।।

को छन् भन् सरकार राज्यभरिमा ती वृद्धवृद्धा कति ?
को को छन् घरबारहीन तहमा मागेर खान्छन् कति ?
को छन् उच्च घरानियाँ सकल ती छन् को मझौला जन ।
रोक्ने के छ विकल्प मान्य जन हो सोध्दै छ मेरो मन ।।

कोही बाध्य भएर खेप्न नसकी मागेर खान्छन् कति ?
कोही कुण्ठित छन् बुहार्तन बढी लाचारमा छन् कति ?
वैरागी मन हुन्छ एकल हुँदा को को रहेछन् भन ।
रोक्ने के छ विकल्प मान्य जन हो सोध्दै छ मेरो मन ।।

माग्ने काम त तुच्छ हो तर अझै माग्छन् स्वयम् खै किन ?
पार्ने बाध्य छ को घचेट्छ कसले छन् बाध्यकारी किन ?
नाता भेट हुँदा गयो सरम जो बाँचेर मर्छन् तन ।
रोक्ने के छ विकल्प मान्य जन हो सोध्दै छ मेरो मन ।।

०००
भक्तपुर