बाबा

बाबाको ममता मिलेर घरमा आमा रमेकी कति । बाबाबाट खुसी निरन्तर दिँदा सन्तान छन् पूर्ण ती ।। बाबाको मन तृप्त हुन्छ सबका मारेर जो राग छन् । बाबा धन्य पहाडझैँ अचलभै आँधी सबै छेल्दछन् ।।

कविराज घिमिरे

कविराज घिमिरे :

बाबा क्षेत्रविहीन छन् भुवनमा सम्पूर्णले मान्दछन् ।
बाबाका अति योग्य कर्म फलदा संसारले जान्दछन् ।।
बाबानै सब राजमार्ग गति हुन् दौडाउँछन् इन्जिन ।
बाबा स्वच्छ हिमाल पुञ्ज हिमका सर्वत्र छन् कञ्चन ।।

बाबा साक्षरता मुहान सबका शीर्षस्थ हुन् शिक्षक ।
बाबा झुक्न र गल्न सक्नु र कहाँ बन्छन् कडा भिक्षुक ।।
बाबामा अभिमान गौरव दुवै पाइन्छ हेर्ने गरौँ ।
बाबाको मन भाँचिँदैन कहिल्यै आएर बुझ्ने गरौँ ।।

बाबा बन्धक छन् सदैव घरमा सन्तान हाँस्लान् भनी ।
बाबाको परिहास गर्छ जसले के बुझ्छ ऊ जीवनी ।।
बाबा वृद्ध भए अझै भर हुने सन्तानलाई बुझौँ ।
बाबाको घरबार हुन्छ कसिलो आदर्श मानी पुजौँ ।।

बाबाको ममता मिलेर घरमा आमा रमेकी कति ।
बाबाबाट खुसी निरन्तर दिँदा सन्तान छन् पूर्ण ती ।।
बाबाको मन तृप्त हुन्छ सबका मारेर जो राग छन् ।
बाबा धन्य पहाडझैँ अचलभै आँधी सबै छेल्दछन् ।।

०००
भक्तपुर

News Views: 914

कविराज घिमिरे प्रकाशित मिति : जेठ ९, २०८२