नेपाली हास्यव्यङ्ग्य अनलाइन पत्रिका

दुष्यन्त भट्टराई :

घर समाज कुरा किन काट्छ सधैँ
वचनभित्र छुरा किन राख्छ सधैँ
गलत हेर विरोध गरून् सुमन
अधिक पूजित हुन् अब ज्येष्ठ जन ।१

भरण पोषण गर्दछ सन्ततिमा
अनि बचावट गर्दछ शोषणमा
छ अपहेलित जो बुझ हे सुमन
अधिक पूजित हुन् अब ज्येष्ठ जन ।२

व्यथित देखिन सक्दछ वृद्ध मन
थकित भेटिन सक्दछ वृद्ध तन
दिन सकून् सहयोग समस्त मन
अधिक पूजित हुन् अब ज्येष्ठ जन ।३

तनय वा तनया पनि साथ न छन्
दुख र दर्द सबै अनि उल्झन छन्
अब गरौँ अभिनन्दन वृद्ध मन
अधिक पूजित हुन् अब ज्येष्ठ जन ।४

०००
झापा, हाल- अमेरिका