नेपाली हास्यव्यङ्ग्य अनलाइन पत्रिका

कविराज घिमिरे :

कुनै अतीव वृद्ध छन् चुहुन्छ ऱ्याल कोटमा
दिँदैन ज्योति नेत्रले सहेर बस्छ चोटमा
सही न सुन्छ कर्णले यताउता कुनै ध्वनि
न दन्तले चपाउँदा चपिन्छ खाद्य त्यो पनि ।। १

नसा छ राजनीतिको पृथक् हुँदैन स्वार्थ छ
युवा अगाडि आउँदा भनेर बस्छ व्यर्थ छ
भलो न गर्छ देशको न सक्छ जोत्न नै हलो
इमानमा रहेन है प्रबुद्ध वृद्धको थलो ।। २

ठुलो गरेर कल्पना भरोसहीन मार्गमा
हिँडाउँदै लगे वृथा रुँदै छ लोक झन् यहाँ
धुलो छ वादभित्र नै सफा हुँदैन भन्दछन्
भनी ममात्र बुज्झकी स्वयम् वरिष्ठ गन्दछन् ।। ३

सुधार हुन्छ के गरी भएछ देश लङ्गडो
मियो छ जालझेलको बनेन कामको खलो
बुढा मिलेर राज्यको हुँदै छ आज दोहन
सतर्क लोक हौँ सबै भएन हेर्न शोभन ।। ४

बुढाबुढी समग्र यी बनेर शिष्ट देउता
पुजुन् समाजले सबै तथापि छैन एउटा
छ लोभमात्र वृद्धमा बढी अपार लालच
भएछ खोट राज्यमा घुमेर हेर जाल छ ।। ५

बुढा मिलेर राज्यले खपेर भार राष्ट्रको
न थेग्न सक्छ राम्ररी न गर्न सक्छ पार यो
उता नखोक भन्दछन् हुँदैन लाज तैपनि
सचेतना पुगेन है न नाच छैन आँगनी ।। ६

०००
भक्तपुर