नेपाली हास्यव्यङ्ग्य अनलाइन पत्रिका

जगदीश्वर पाेखरेल :

पियाराको माया लाग्छ भन्छिन् लजाई ।
पियारी हाँस्दै छन् ओठ लाली लगाई ।।
डुबेका मायामा वृद्ध जोडी खुसी छन् ।
मिलेका साथी झैँ वृद्धवृद्धासँगै छन् ।।१

हिमाली मालीको माथ टल्क्यो खिलेर ।
अडेको मानीले घुम्छ जाँतो मिलेर ।।
सदा जोडी हाँस्छन् प्रेम फन्दा परेछन् ।
मिलेका साथी झैँ वृद्धवृद्धासँगै छन् ।।२

कलाकर्मी वृद्धा भाव पोख्छन् सुरम्य ।
भला जोडी उम्दा कर्म गर्छन् अगम्य ।।
मुसारी दाह्रीमा स्नेह भर्दै रमाउन् ।
मिलेका साथी झैँ वृद्धवृद्धासँगै छन् ।।३

सधैँ हाँस्छन् बोल्छन् हर्षमानी अपार ।
सँगै घुम्छन् रम्छन् फल्छ रोपे असार ।।
सिकेका जे जे छन् दिव्य वाणी सिकाउन् ।
मिलेका साथी झैँ वृद्धवृद्धासँगै छन् ।।४

परेवा जोडी झैँ रम्न सक्ने सदैव ।
असाध्यै प्यारा छन् छक्क पर्दै छ दैव ।।
मिलेका जोडीले राष्ट्रलाई हँसाउन् ।
मिलेका साथी झैँ वृद्धवृद्धासँगै छन् ।।५

०००
पाउँदीबजार, लमजुङ