नेपाली हास्यव्यङ्ग्य अनलाइन पत्रिका

अहिलेसम्म कुनै कार्यक्रममा आसन ग्रहण गर्न पाउनु भएको छैन भने आउनुस् मेरो आलु कार्यक्रमको घनिष्ठ अतिथि बन्न पाउनु हुनेछ । कुनै आयोजकले तपाईलाई बोलाएर आसन ग्रहण गराउन कन्जुस्याँई गरे भने त्यहाँबाट जुरुक्क उठेर फुरुक्क हुँदै मेरो आलु कार्यक्रमको घनिष्ठ अतिथि बनेर पिंडालु खान नभुल्नु होला । प्रमुख अतिथिभन्दा पनि ठूलो ओहदाको घनिष्ठ अतिथि बन्न जो कोहीले पाउँदैनन् । विशिष्ट, अति विशिष्ट, कनिष्ट, प्रविष्ट अतिथि भन्दा निकै फरक र भिन्न प्रवृतिको घनिष्ट अतिथिको ओहदामा आसन ग्रहण गर्न आलु पार्टीमा ठालु बन्नेले कुनै पनि किसिमको घनचक्कर लाउन छुट छ । जनचक्करमा ठक्कर खाएका अकबके बकबकेको अस्वीकृत प्रमाणपत्र पाएको मिलिभगतमा चपरचण्डको झुण्ड बनाएर नेतृत्व गर्न सक्ने मौका परे घरभित्र पसेर रडाको मच्चाउनेलाई प्रविष्ट अतिथि बनाउन सकिने छ ।

प्रमुख, अति विशिष्ट, विशिष्ट अतिथि बनाउन हुँदा घनिष्ट अतिथि पनि बनाउन मिल्छ भन्ने पक्षमा मेरो व्यक्तिगत अधिकार आयोगले सडालतमा वकालत होइन बकालत गरिसकेको छ । त्यसैले घनिष्ट अतिथिका साथमा बकालतमा संलग्न बकिलहरू मेरो कार्यक्रममा मुन्टिए भने सडिष्ट अतिथि पनि बनाउन सकिने मेरो आलु पार्टीले पिंडालु निणर्य गरेको छ । सडालतका सडाधीशहरू मेरो आलु पार्टीको सम्पर्कमा आए भने म उनीहरूलाई सडिष्ट अतिथिका रूपमा कार्यक्रममा थेच्चासन गराउन पछि पर्दिन । मैले मन नपराउने मानिस मेरो निमन्त्रणा स्वीकार गरेर आएमा उसलाई पनि मन नपरेको मान्छेलाई काठको पिरामा भन्दै थेच्चारिन अनुरोध गर्न बिर्सदिन । यदि आएन भने घिसारेर भए पनि ल्याएर पिर्कामाथि थेचार्ने छु ।

समाजमा घिनिएका, छिनिएका र चुलिएकालाई आसन ग्रहण गराउँदा गराउँदा वाक्कदिक्क भएका संघ संस्था वा राजनीतिक छलका ढोकेहरूलाई, प्रशासनिक घोकेहरूलाई र छुटफुटमा परेकालाई नयाँ तरिकाले कार्यक्रममा समावेश गराउने रणनीति अनुसार यो संस्कारको विकास गर्न लागिएको हो । नेपालमा कार्यक्रम गर्दा पुरानो शैलीले गर्ने प्रवृति यो २१ औँ शताब्दीमा अझ झुसि भएर चुलिएकोले पोख्नका लागि र नयाँ कुरा बोक्न बोकाउनका लागि यो घनिष्ठ अतिथिको नयाँ दरबन्दी सिर्जना गरेर आसन ग्रहण गराउन लागिएको हो । हाम्रो आलु पाटीले सबैलाई घाँटी घाँटी आउने गरी आलु कोच्याएर गरेको दुईजना उपस्थित विशाल झेलाको भेलाले मेला देखाउन सफल भएपछि यो घनिष्ठ अतिथिको दरबन्दी सिर्जना गरेको हो ।

आफ्नै घनिष्ठ मित्रलाई अतिथि बनाउन गोज्याङ्ग्रेले घनिष्ठ अतिथिको दरबन्दी सिर्जना गरेछ भन्ने ठान्नु होला तर होइन । अन्य कार्यक्रममा कनिष्ठ अतिथि समेत बन्न नपाएका समाजमा म्याउ गर्न नपाउने तर ढ्याउ ढ्याउ गर्दै कार्यक्रममा कुर्सी पादने ढाँडेहरूलाई भित्र छिराउन यो दरबन्दी सिर्जना गरिएको हो । हाम्रो आलु पाटीको लक्ष्य र उद्देश्य नै पुराना ढाँडे बिराला वा पहिलेदेखि नै टन्न अघाएर भुँडी फुलाउँदै बसेका, अख्तियारको जालोमा फँसेका र फैसलाको पालो कुर्दै समय गुजारेकालाई भित्र छिराउनु हो । यसरी भित्र छिराएर घनिष्ठ अतिथि बनाउँदा भोलिका दिनमा पाटीको आम्दानी राम्रो भएर गोठका बस्तुभाउ जति सबै पाल्न सहज हुने छ । राजनीतिलाई भन्दा बढी अराजनीतिलाई प्राथमिकता दिएर गठन भएको यो आलु पाटी विश्वकै शुन्य स्थानमा पुग्न सफल भएको छ । जनताको खुन पसिना चुसेर, जनताको सम्पतिमा ढलिमली गरेर अर्काको हली गोठालालाई उचालेर गठन भएको यो विश्व च्याम्पियन शुन्य महत्वको दल भएकोले घनिष्ठ अतिथि राख्दा दलको बल बढ्ने निश्चित छ । बल बढ्यो भने दलमा ढाँटछल पनि बढ्ने भएकोले दल चलाउन चल अचल सम्पतिको जो हो गर्न सहज हुन्छ ।

साँच्चै ढाँटछलको कुरा गर्ने हो भने कार्यक्रममा परिस्थिति अनुसारको अतिथि बनाउनु पर्ने भएकोले पनि यो घनिष्ठ दर्जाको मन नपरेको अतिथिको दरबन्दी कार्यक्रम अवधि भरिका लागि सिर्जना गर्नु परेेको हो । घनिष्ठ अतिथिका बारेमा मैले धेरै स्पष्टिकरण दिइसके । अरु थप प्रष्टिकरण दिनु परे पनि पछि सरौला र लुसुक्क लस्कौला । तर जे जे भए पनि ज जस्ले जे भने पनि म यो घनिष्ठ अतिथि छाड्दिन । मलाई तपाईहरू कार्यक्रममा बोलाउनु हुन्छ भने मलाई घनिष्ठ अतिथिको रूपमा धुपमै राखेर भए पनि थेच्चारिन अनुरोध गर्न सक्नु हुनेछ । म आसन ग्रहण गर्न भन्दा बढी थेच्चारिन नै मन पराउने भएकोले मेरो अनुकुलता र इच्छा पनि पूर्ण हुनेछ । यदि तपाईहरूलाई म मन नपर्ने मान्छेको हैसियतमा रहेछु भने सोफा कुर्सीमा होइन काठको पिरामा भुइँमा नै लम्पसार परेर थेच्चारिन दस औला जोडेर विनम्र अनुरोध गर्न सक्नु हुनेछ ।

मेरो आलु पाटीको झिंगा, मच्छर, उडुस, उपियाँ जस्ता ठुलावडा उपस्थित हुने कार्यक्रममा तपाईका मान्छेलाई पनि स्वागत छ । कोही आफन्त नाता गोताका वा सासू, ससुरा, साला, साली, भाञ्जा, भाञ्जी, मामा, माइजू काका, काकी लगायतका दूरकट वा निकटकालाई आसन ग्रहण गराउनु पर्नेछ भने मलाई खबर गर्नु होला । सडिष्टको दरबन्दी कायम मुकायम पारेर भए पनि सडिष्ट अतिथि नै बनाएर, सोह्रको साटो अठार बीस श्रृङ्गारले सजाएर, गधामा सवार गराएर, नभएको बजार घुमाएर, स्वागत गर्ने छौ ।

घनिष्ठ र सडिष्टको कुरा मिलेन भन्नु होला । यहाँ मिलाए जे पनि मिल्छ । नमिल्ने कुरा त मिलाएर गरिन्छ भने झन अतिथि जस्तो कुरामा छुरा हान्ने समेत सहमत हुन्छन् । नेपालमा नमिल्ने कुरा केही छैन । रातारात मुसा दरबारमा व्यर्थ खन्त्रीले घचेट गन्तव्य तयारीकालागि व्यापारीलाई करमा सर सर भन्न भूत भैसकेको नाक सुकेको (ना.सु.) भित्र छिराउन मिल्छ भने अतिथि बनाउन किन मिल्दैन ? मुसा दरबारमा मुसेहरूले जथाभावी प्वाल पारेर भित्रको सबै ओसारेर खोक्रो पार्न मिल्छ भने मैले नयाँ अतिथि बनाएर कार्यक्रमलाई भरिभराउ र रोमाञ्चक बनाउन किन मिल्दैन ? यदि कसैले मिल्दैन भन्यो भने म मेरो आलु पाटीको कार्यक्रममा कुनै घुस्याहालाई ल्याएर घुसपैठ अतिथि पनि बनाउँछु । कनिष्ठलाई वरिष्ठ, शत्रुलाई घनिष्ठ, पत्रुलाई प्रविष्ट अतिथि पनि बनाएर देखाउँछु मलाई कस्ले के गर्छ ?

पत्रुलाई प्रवेश र शत्रुलाई स्वागतको नीति अबलम्बन गरेको मेरो आलु पाटीले चालु भेलामा सबैलाई ठेलामा राखेर मेला घुमाउने योजना तुहाएको छ । यो योजनाको चटक नाटकमा परिणत गरेर समाजमा सुख शान्तिका लागि दुःख झेल्नु परोस् भन्दै प्रसादका रूपमा सबैतिर वितरण गरिने छ । यसरी वितरण गरिने प्रसादलाई पाटीले बनाएको नीतिको बुटीका रूपमा धुप धुवार गरेर ग्रहण गर्न सकिने छ । आलु पाटीको आलु कार्यक्रममा सिपालु बनेका ठालुले तालु घोटिने गरी बालु दलेर बिद्धान हुन सक्नेछन् । यसरी बिद्धान बनेपछि आलु पाटीको घनिष्ठ, सडिष्ट, कनिष्ठ, प्रविष्ट, अतिथि बनेर छलाङ मार्न सक्नेछन् ।

अन्त्यमा म के भन्न चाहन्छु भने विश्वमै कतै नभएको नेपालको आसन ग्रहण प्रणालीले विश्व रेकर्ड प्राप्त गर्न गिनिज बुकमा नाम लेखाएर शुन्य स्थानको आलुको आकार ग्रहण गर्ने छ । यो आलु पाटीको आलु कार्यक्रमको आसन ग्रहणको खाका भएकोले यसको परिणाम पनि आलु नै हुनु पर्छ भन्ने मान्यतामा म जन्मेदेखि हालसम्म बेहाल भएर बसेको छु । त्यसैले आलु कार्यक्रममा घनिष्ठ, कनिष्ट, सडिष्ट र प्रविष्ट अतिथि बनाएर नयाँ नेपालको नयाँ प्रयोगमा घरदेशदेखि प्रदेशसम्म र संघीयताको प्वालसम्म अभियान चलाउने योजना रहेको छ । मेरो योजना सफल पार्न परिस्थिति अनुसारको अतिथि आवश्यक पर्ने भएकोले पनि आलु पाटीले आसन ग्रहणमा नयाँ मापदण्ड निर्धारण गरेर लागु गर्ने दुष्प्रयास गरेको व्यहोरा सबैमा जग जाहेर गर्दछु । जय व्यङ्ग्य ! जय अतिथि ।

उदयपुर