नेपाली हास्यव्यङ्ग्य अनलाइन पत्रिका

१.
भ्रष्टाचार
आफ्नो सरकार हुँदा-
निमिट्यान्न हुन्छ
अर्कोको सरकार आएपछि-
घाँटीघाँटी आउँछ ।

२.
जिउ गन्हाए पनि हुन्छ तर
ईज्जत गन्हाउनु भएन ।
गन्हाएको त नाकै हो
पेट्रोलले धुँदा पनि गएन ।

३.
कहिले करोड करोडको डिलिङ छ
कहिले बालुवाटारै बेच्ने अरे ।
घाँटीबाट लौरो खाँदेर
अटेसमटेस घिच्ने अरे ।

४.
मोजा बदल्न नजान्नेले
देश बदल्ने कुरा गरेका छन् ।
देशले माग्यो भन्दै भिडाउँदा कोही
शहीद हुनलाई मरेका छन् ।

५.
एउटा माफियाले अर्को माफियालाई
ओई माफिया भन्यो ।
आफ्नै मनले बोलाएछ भनी
पहिलो दङ्ग पर्‍यो ।

६.
सलाद सलादविना टुहुरो छ
अर्थात्
सलाद
जहाँ सबथोक छ, सलाद छैन ।

७.
फाल्नका लागि थोत्रा जुत्ता
झोलाभित्र कोचेर राखिएका थिए
एउटा जुत्ताले जिब्रो बाहिर निकाल्दै बोल्यो
हजुरका नेताका गलामा सजिनका लागि
चुनावपछि त म पनि काम लाग्छु नि मालिक
हो
अक्सर म थोत्रा जुत्ता फाल्दिनँ ।

८.
छोरीलाई अधिकार माग्नेले
बुहारीलाई दिनु पर्छ कि पर्दैन ?
उनले सन्तान जन्माउन पाउँछिन्
नागरिकता पाउनुचाहिँ पर्दैन ?

९.
माला लगाउन मन हुन्छ उहाँलाई
जति नै किलोको भैदियोस् ।
जुत्तैको किन नहोस् तर
भिर्दा सजिलो भैदियोस् ।

१०.
धान, मकै, तरकारी,
सिमेन्ट र छड बेच्ने होइन
विदेशमा बेच्ने भनेकै
मान्छे हो मान्छे
तरह तरहका कानून बनाएर
सरकार त्यही काम गरिरहेछ ।

हेटौडा, मकवानपुर