नेपाली हास्यव्यङ्ग्य अनलाइन पत्रिका

मन्त्रिणी ज्यूलाई जसरी भए पनि एक पटक पतिदेवको उच्च आसनमा बस्ने लालसा जागेर आयो ।

एक दिन पतिदेवको गाला मुसार्दै अनुनय गरिन्-
“स्वामी मेरो एउटा ठुलो इच्छा छ ।”

“भन न प्रिय मैले तिम्रो सबै इच्छा पुरा गरेकै छु अब के त्यस्तो इच्छा नै बाँकी छ र तिमी भित्र ?”

“मलाई एक पटक हजुरको यो प्रधानमन्त्रीको कुर्सीमा बस्न सारै ठुलो इच्छा छ स्वामीदेव ।”

“हेर माया यो कुर्सी तिम्रो नै त हो ! म त केवल एक मोहरा न हुँ । तिम्रो इच्छा बमोजिम नै त म चलिरहेको छु । होइन ..अब तिमीलाई यो कुर्सी नै किन चाहियो र बाबा ?”

“पतिदेव मलाई जसरी नि यो कुर्सीमा बस्नु छ, के मेरो हक लाग्दैन र !?”

प्रियाको अत्यन्तै जिद्दी भएपछि पतिदेवको केही सिप चलेन । पत्नीलाई कसरी यो उच्च आशनमा राख्ने भनेर उपाय सोच्न थाले ।

पार्टीको आकस्मिक बैठक बोलाए र आफ्नो पार्टीको घोषणापत्रमा चुनावी नारा लेख्न लगाए ।
“पहिला पहिला अरुलाई यसपालि प्रधानमन्त्री महिलालाई ।”

देशभरबाट महिलाहरूको एउटै आवाज गुन्जन थाल्यो- “महिला प्रधानमन्त्री हुनैपर्छ हामीले अधिकार पाउनैपर्छ ।”

चुनावी नारा सफल भयो ।
मन्त्रिणीज्यूको मुहार उज्यालो देखिन्थ्यो ।

०००
हेटौंडा