नेपाली हास्यव्यङ्ग्य अनलाइन पत्रिका

किशन पौडेल :

मैले एउटा
झोला भेट्टाएको छु
अत्यन्तै पुरानो
मक्किएर ठाउँ ठाउँमा प्वाल परेको ।
झोलाभित्र
ल्याप्चे छाप ठोकिएका
एक थान स्वाभिमानका
बन्द खामहरू छन्
च्यातिएर धुजा धुजा परेका
एक मुठ्ठी इमानका
दस्ताबेजहरू छन्
कालो रङ लतपतिएको
एउटा दुर्गन्धित डायरी छ
डायरीमा रातो मसीले लेखेको
जाल, झेल र षड्यन्त्रको फेहरिस्त छ
झोला भित्र एउटा झुत्रो मेनोफेस्टो छ
विद्रुप देखिने एउटा चरित्रको चित्र छ
भन्नुस् महासय !
यो झोला कसको हो ?

०००
२०८२/०२/२०
मकवानपुर