नेपाली हास्यव्यङ्ग्य अनलाइन पत्रिका

किशन पौडेल :

कमरेडहरू –
भूतसँग डराउनु हुँदैन भन्थे
प्रेत जगाउनु हुँदैन भन्थे
आजकल प्रेतको दोछायाँ देखेर
तिनीहरूकै खुट्टा कामिरहेको देख्छु ।

कमरेडहरू –
विलासी सपना देख्नु हुँदैन भन्थे
महत्त्वाकाङ्क्षी चाहनाहरू पाल्नु हुँदैन भन्थे
आँटो पिठो, धुलो मैलोलाई नै आदर्श ठान्थे
भुईँका मान्छेहरूलाई भगवान् मान्दथे ।

कमरेडहरू –
हावामा मुठ्ठी उचालेर छाती तनक्क पार्दै
सामन्तीको जरो उखालेर फाल्नुपर्छ भन्थे
वैरीहरूसँग सुरुङ युद्ध गर्नुपर्छ भन्थे
छलाङ मारेर फड्किने ठुला कुरा गर्थे
भाषा, लवज, शैली अद्वितीय लाग्दथ्यो ।

कमरेडहरू –
जनताका गीत गाउँदै गाउँदै
तिलस्मी सपनाहरू बोकेर आँगनमा आए
रुखो-सुको खाएर मझेरीमै सुते
लाग्दथ्यो दुखका दिनहरू सकिए
दैलोमै साक्षात् देवताहरू भेटिए ।

कमरेडहरू –
अँध्यारोको युग सकिनै लाग्यो भन्दै
उज्यालो रातो घाम देखाउँदै
पत्तै नपाई हाम्रै काँधमा चढेर उक्लिए
अहिले तिनीहरू हाम्रै पिठ्युँमा प्रहार गर्दै छन् ।

०००
मकवानपुर