नेपाली हास्यव्यङ्ग्य अनलाइन पत्रिका

यो को ठुलो ? भन्ने खेल मानवमा मात्र नभई ब्रह्माले गरेको सृष्टिलाई दृष्टि दिने हो भने पनि परापूर्व कालदेखि चलेको पाइन्छ धर्मशास्त्रहरूमा पनि कति सुनेका छौं ब्रह्मा, विष्णु र महेश्वरका बिचमा पनि को ठुलो ? भन्ने होडबाजी चल्थ्यो भन्ने कुरा यसै प्रसङ्गमा वरिष्ठ हास्यव्यङ्ग्यकार भैरव अर्यालले एउटा निबन्धमा यसरी व्यक्त गर्नुभएको छ :

एकपटक ब्रह्मा र विष्णुमा तँ ठूलो कि म ठुलो भन्ने बारे गम्कागम्की परेछ, फैसलाको लागि दुवै महादेवको कहाँ पुगेछन् । देवतामाथिका उपरदेव महादेव, उसै त धुरन्धर, झन् त्यो मौका पाएका । हत्त न पत्त आफ्नो अनौठो ज्योतिर्लिङ्ग तेर्स्याउँदै भनेछन्, ’लौ, एक जना उँधो जाऊ, अर्को उँभो । जो यसको फेद वा टुप्पो पत्तो लगाउँछ, त्यही ठुलो ।” मारेन के ? न्यायाधीश मानिसकेपछि आज्ञा नमानुन् कसरी ? ब्रह्मा र विष्णु राणाकालीन लाठसाहेबका चाकरीवाल दौडे ॐ स्याँस्या गर्दै लागे तलमाथि । तर दुवैले लक्ष्य भेटाएनन् । अनि लगौटी बाँध्दै महादेवले छाँटे- को ठुलो रहेछ । मेरा अगाडि तिमीहरू दुवै उस्तै हो लौ जाओ ।”

हो, हाम्रो मुलुकको वर्तमान राजनीतिको अवस्था पि ठ्याक्कै त्यस्तो भएको छ । कोभन्दा को कम अर्थात् मेरो गोरुको बाह्रै टक्का । मैले भनेको मात्र ठिक अर्थात् म मात्र ठुलो । सुशासन, समृद्धि र जनताको हितका लागि राणाशासन बाधक भनेर तिनका विरूद्ध स्वाभिमानी नेपाली लडे, कैयौं फाँसीमा चढे र सहिद भए त्यसपछि पञ्चायत परिवर्तनको पोको बोकेर आयो। गाउँफर्क राष्ट्रिय अभियानको गीत गायो राजाका मित लायो गरिबको बजेट मात्र खायो र अघायो । यसलाई फाले, प्रजातन्त्रको जग हाले, समस्याको हल हुन्छ भनेर सबैले बल गरे तर पनि उही निम्छरामाथि छल भयो । राहत आएन आहत मात्रै आयो त्यसलाई पनि खराब भनेर सराप गरे ।

यतिले पुगेन अब लोकतन्त्र हुँदै गणतन्त्रको जग हाल्नुपर्छ भनेर सबैलाई जगाए, हामी जाग्याँ, यिनले जे भने पनि पछिपछि लाग्यौं र सबै कुरा पत्यायौं तर जुन जोगी आए पनि कानै चिरेका भने झैँ एउटा राजा अन्मिए पनि हाल झन् धेरै राजाहरू जन्मिएको देख्दा, मलाई भने सधैँ खुल्दुली लागिरहेको छ यदि महादेवलाई पुरानै राजा ठुलो कि अहिलेका राजाहरू भनेर सोध्ने हो भने साँच्चै को ठुलो भनेर जबाफ दिन्थे होलान् ?

०००

‘बुद्धिपुराण’ (२०७८)