नेपाली हास्यव्यङ्ग्य अनलाइन पत्रिका

अन्जु शर्मा :

कसैले कालो मोसो दले । कसैले जुत्ताको माला लगाइदिए । लाठी र ढुङ्गा वर्षाए । ऊ मुस्किलले भिडबाट भाग्न सफल भयो । भीड बोल्दै थियोे “यो बलात्कारी हो । यसले बैङ्क लुटेर भागेको थियो । यो युवा बेच्ने दलाल हो । यो तस्कर हो ।”

भीडको दृश्य र कुरा सुनिरहेका एक भलाद्मीले मनमनै सोचे यस्तो साहसी मान्छे मेरो कम्पनीमा काम लाग्छ । उनले भोलिपल्ट कुटाइ खाने व्यक्तिलाई भेटेर अस्पतालमा भर्ना गराए । अनि आफ्नो पत्रकारलाई लेख्न लगाए “राजनीतिक विवादमा कार्यकर्ता घाइते हुँदा नेताद्वारा निरिक्षण ।”

त्यसको केही दिनमा नेताले उक्त व्यक्तिलाई राजनैतिक नियुक्ति गरे । यो देखेर अचम्म पर्दै श्रीमतीले सोधिन् -“हैन यस्तो फटाहा मान्छेलाई किन यति ठूलो पदमा राख्नुहुन्छ ?”

नेता मुस्कुराउँदै भन्छन्- “राजनीतिक कम्पनी भनेको सोझासाझाबाट चल्ने कम्पनी हैन । हामीलाई जनता ढाट्न, लुट्न, धुत्न थुत्न, झुटो आश्वासन बाँड्न यस्तै गुण्डाको खाँचो हुन्छ ।”

नियुक्तिको घोषणा सुन्ने बित्तिकै तिनै जनता फूलको माला लिएर पहिराउन पुगे ।

०००
रातोपुल, काठमाडौं