नेपाली हास्यव्यङ्ग्य अनलाइन पत्रिका

अशोककुमार शिवा :

समयसँग दौडिएको प्रविधि र प्रविधिले ल्याएको अनेकन विधिको प्रयोग गर्न हामी पनि विधिवत विधिकार हुनुपर्ने बाध्यता छ । विधिको विधिकार हुन प्रविधिको प्रयोग वा उपयोग गर्न पारङ्गत पनि हुनुपर्छ ।

कहिलेकाहीँ फुर्ती लगाउँदा लगाउँदै खरो सुर्ती चेपेजस्तो मुख पार्नुपर्ने हुन्छ । सुर्ती भन्ने चिज पनि फेरी कस्तो भने लत नपरुन्जेल गारो लत पर्न थालेपनि छोड्न साह्रो । पर्पराउने टिमुर, खर्खराउने सुर्ती, चिडचिडाउने पिरो, चरचराउने घाउ अनि करकराउने बाउ छेउछाउ नभएको बेस भन्दाभन्दै सङ्गत पर्न थालेपछि सबै पाच्य हुने पनि विधिकार हुनु जस्तै हो ।

हरेक अवस्थामा पनि अनेक काम गर्न जान्नु वा मनपराउनु पनि विधि नै पहिला जान्नु पर्ने रहेछ । के काम गर्दा कुन कुरा प्रयोगमा ल्याउने वा प्रयोग हुने सामग्री कतिको काम मैत्री हुन्छ भन्ने जान्नु पनि प्रविधिको विधिकार हुनै पर्छ । अधिकांश काम गर्ने भनेको हातले हो । हातको काममा बडो सिपालुसँग साथ दिने दश भाइ औँलाहरू छन् । कामको प्रकृति अनुसार हात र हातका औँलाहरूको जोहो जतन पनि गर्नै पर्ने हुन्छ । यसरी हात र औँलाको जोहो जतनको लागी हातको पञ्जासँग ठ्याक्क मिल्ने गरी पञ्जा (अङ्ग्रेजहरूले ग्लोभ भन्छन्) बनाएको हुन्छ । पञ्जा लगाएर काम गर्दा हिलो माटो तथा फोहर समेत हातमा नलाग्ने भएकोले पन्जा लगाउनु स्वास्थ्यको लागी राम्रो मानिन्छ ।

स्वास्थ्यको लागी लाभदायक छ भनेर खाना खाँदा पनि ग्लोभ लगाउनु चाहिँ अलिक सुहाउने कुरा भएन भन्ने पनि लाग्न सक्छ । तर खाना खाँदा पनि पञ्जा नभएर ग्लोभ भने लगाउन नसकिएला भन्न सकिन्न । पातलो ग्लोभ लगाएर कपाल रङ्गाउने काम गर्न सकिन्छ । तर पन्जा लगाएर काम गर्दा के समातियो त्यो भने भेउ पाउँन सकिँदैन ।

आजकाल प्रायजसो मोबाईलमा म्यासेज आउने जाने क्रम भइरहन्छ । यसरी मोबाइलमा म्यासेज आउँदा यदी ग्लोभ लगाएर अन्य केही काम गरिदैँछ भने किबोर्डमा गलत अक्षर दाबिन सक्छ । गलत अक्षर दाबियो भने अर्थको अनर्थ हुनसक्छ । कहिलेकाहीँ अनर्थले संवाद व्यर्थ बनाउन सक्छ भने कहिले सामान्य भनेर गरिएको संवादले रोचक मोड लिन सक्दछ । जति रोचक भयो उति म्यासेन्जर बिजि होला तर अनर्थले व्यर्थ भएको संवादको पुनरउठान हुन लामो समय लाग्न सक्छ ।

त्यसैले मलाई यो ग्लोभ लगाएर गर्ने कुनै पनि काम ठिक लाग्दैन । बरू बिना ग्लोभ नै भटाभट काम गर्‍यो, काम सकेर साबुन पानीले राम्ररी हात धोईपखाली गर्‍यो सक्किगो ।

०००
२०८०/१०/१२
गल्कोपाखा, काठमाडौं ।