नेपाली हास्यव्यङ्ग्य अनलाइन पत्रिका

डा. खगेन्द्रप्रसाद दाहाल :

कोही मानिसका खराब मन छन् देख्छन् नकारात्मक
चस्मामा छ कि दोष दृष्टिपथ नै हुन्छन् नकारात्मक
अर्काको सुख वा मुहार हँसिलो देखेर जो जल्दछ
चिन्नैपर्छ विषाक्त मानिस जहाँ सद्भावना गल्दछ ॥

आफू मात्र सही र निर्मल अरू जम्मै झुटो देख्छ जो
आफ्नो मात्र बढाइँ गर्छ जसले ज्ञानी स्वयं ठान्छ जो
अर्काको अपमान गर्छ उसले धुर्त्याइँमा चल्दछ
चिन्नैपर्छ विषाक्त मानिस जहाँ सद्भावना गल्दछ ॥

अर्काका पनि रायमा कति कुरा हुन्छन् भला सत्यता
सुन्नैपर्छ तथापि दुर्जन सदा सुन्दैन ती सत्यता
मात्रै क्रोध घमन्डको भँवरमा आगो बनी बल्दछ
चिन्नैपर्छ विषाक्त मानिस जहाँ सद्भावना गल्दछ ॥

आफ्नो स्वार्थ हुँदा समीप छ अझै चिप्ला कुरा गर्दछ
चिल्लो घस्छ लपक्क पार्छ मुखले झन् छेउमा सर्दछ
आफ्नो स्वार्थ पुगे त्यसै पल सबै आधार नै ढाल्दछ
चिन्नैपर्छ विषाक्त मानिस जहाँ सद्भावना गल्दछ ॥

के हो आदरभाव मद्दत भनी जान्दैन केही अरू
मानी सानु अरू अनादर गरी सन्तुष्टि लेला बरु
त्यस्ताबाट सदैव दूर रहँदा पो जिन्दगी फुल्दछ
चिन्नैपर्छ विषाक्त मानिस जहाँ सद्भावना गल्दछ ॥

०००
झापा