मिलेमतो (२)
दिशा अनेक छन् यहाँ अनेकतर्फ फर्किने नमिल्नु स्वार्थ हो सदा र झर्किने ततर्किने गुदी मिले सबै दिशा फनक्क फिर्न सक्दछन् प्रपञ्चपूर्ण बोलको खगोल भिर्न सक्दछन् ॥
डा. खगेन्द्रप्रसाद दाहाल :
विचार उम्रिने गरा सिँचाइ शून्यझैँ भयो
विचारका मुना सुकी त्यसै त्यसै पहेँलियो
विचारदेखि दूर छन् विचारका जराहरू
जताततै बरालिए विचारका सुराहरू ॥
रटी बिहानका कुरा रजाइँ गर्छ रातले
प्रभावले प्रताडना सह्यो सधैँ प्रभातले
छ छद्मभेष रातको हटाउँदै छ जुन्किरी
घुसी बिगार्छ मेघले दिवा प्रभा घरीघरी ॥
छ स्वार्थको मियो खडा मिलेमतो गराउने
सिँढी अकल्पनीयमा घरीघरी चढाउने
डकैतको बचाउमा डकैत साधुझैँ भयो
खराब नै फरार छन् र सन्त जेलमा गयो ॥
दिशा अनेक छन् यहाँ अनेकतर्फ फर्किने
नमिल्नु स्वार्थ हो सदा र झर्किने ततर्किने
गुदी मिले सबै दिशा फनक्क फिर्न सक्दछन्
प्रपञ्चपूर्ण बोलको खगोल भिर्न सक्दछन् ॥
छ आज हो यसै गरी मिलेमतो भँडारमा
बनेर फुट्छ खेल भो र अर्थ छैन सारमा
सशक्त शक्ति देशको हराउँदै छ बाहिर
बुझेर लेखनी अझै उचालियोस् उँभोतिर ॥
०००
झापा