नेपाली हास्यव्यङ्ग्य अनलाइन पत्रिका

धनराज गिरी :

“साप,यो के हो ?” प्रहरी जवान हिक्मत दुराले एक प्याकेट ल्याएर एस पी नरेश्वर कार्कीको टेबलमा राख्यो। बिहानै, थानाको गेटमा त्यो उपहार थियो। अचम्म माने हाकिमले। खोलेर हेरे, बीभत्स ! हेर्नै नसक्ने। सात जनेन्द्रीय, पुरुषको। सातो गयो सबैको। साथमा एक पत्र,”तिमी नामर्द पुलिसहरू, कानून हामीले हातमा लिन विवश भइयो !- लेडी गब्बर ! ” यत्ति लेखेको थियो।

अनुसन्धान आरम्भ। शहरका सात युवक गायब। केही दिन अघि एक किशोरीको बलात्कारपछि हत्या, लास जङ्गलमा। युवकहरू नवकुबेरहरू र मन्त्रीहरूका सन्तान। तर लास ? “कल्पनातीत केस !” सनसनी। भाइरल भयो। “को हो लेडी गब्बर?” सबै जिल्ल।

जासुसी सिनेमालाई पनि माथ गर्ने। प्रहरीको टोली जङ्गलभित्र कुकुर लिएर गवेषण गर्न गयो। सात दिनपछि सात चिहान फेला परे। खने। सात लास। सबैको गुप्ताङ्ग गायब। अभिभावकहरूले लास बुझे।

“कल्पनातीत।” लक्षणा।
“को होलान् ?” अभिधा।
“जे भयो, न्याय भयो। यी पापीहरूका लागि उचित सजाय यही हो !” व्यञ्जना।
“बलात्कारीहरूको लागि कडा कानून चाहिन्छ, मृत्युदण्ड !” एउटा लेख आयो।
“सोझै गोली ठोक्ने !” कसैको सुझाव।
“कल्पनातीत दण्ड, सही कर्म !” पाको, गाउँले।

०००
चितवन