नेपाली हास्यव्यङ्ग्य अनलाइन पत्रिका

चन्द्रप्रसाद न्याैपाने :

पस्ने अहंकार छ द्वार चार
घमन्ड छिर्ने पहिलाे विचार
पदीय उन्मादसँगै सवार
तैनाथ घेरा दरबार बार

चिरिन्छ छाती मुटु छाम्नलाई
विवेक त्यागीकन भाइ-भाइ
देखिन्छ घातीजति वज्र छाती
छ पक्षपाती अति राजनीति

ताराहरूका लख फाैजमाझ
छ चन्द्रमा एक विशाल राज
ताराहरूकै बिचमा उदाइ
हुँ चन्द्र आफै छ यही भलाइ

जान्ने सबैथोक म नै हुँ विज्ञ
गन्दैन अर्काे सब देख्छ अज्ञ
त्यहीँ अहंकार फुली घमन्ड
मिल्नेछ फल्दै नफलेर दण्ड

ठुलाे कहाँ लड्छ र हत्तपत्त
उठ्दैन लड्दा सकिई समस्त
लत्रिन्छ सानाे बिरुवा र उठ्छ
ठुलाे लडेमा नउठेर सुत्छ ।

०००
सिन्धुपाल्चाेक