नेपाली हास्यव्यङ्ग्य अनलाइन पत्रिका

ईश्वर पोखरेल :

सिमरन र साजन जोईपोइ । मिलेरै बसेका थिए ।
यसपटकको वर्ल्डकपमा साजनले लाइन लियो ।
प्रारम्भदेखि नै सिमरनले स्पेनको टिम रोजी : साजन अर्जेन्टिनाको पक्षमा उभियो ।
सिमरनलाई डर मेसीको थियो । पहिल्यैदेखि मेसी देखेपिच्छे भन्थी- “मेसी, फुर्ति नला बेसी !’
र, कोठामा हाँसो गुन्जिन्थ्यो ।

मेसीलाई देख्यो कि, सिमरन त्यही भन्थी ।
पछि हाँसो कम हुँदै आयो ।
अझ पछि त हाँस्ने सिमरन मात्र भई ।

सिमरन र साजनको बीचमा पहिले राम्रै ठट्यौली हुन्थ्यो; केहीयता त्यो कम हुँदैआएको थियो ।
फाइनल खेल हेर्न बस्दा जोईपोइका बीचमा ठट्टा पनि भएन । सिमरनले मेसीको नाम पनि लिइन ।
म्याचमा अर्जेन्टिना हारेपछि र गोल्डेन बुट पनि मेसीको भागमा नपरेपछि साजन चुपचाप मर्निङवाकमा निस्कियो ।
ऊ मर्निङवाकमा सधैं पाँच बजे निस्किन्थ्यो र एक घन्टामा फर्किन्थ्यो ।

आज त झन् चार बजेतिरै निस्केको । भात सेलाई सक्यो; छक्काल भई सक्यो : अझै फर्केको छैन ।

०००