नेपाली हास्यव्यङ्ग्य अनलाइन पत्रिका

घर घरबाट पसेर
कहिले सुत्त
खोलाबाट निस्कन्छौ
कहिले गाडी जाम पारी
फुत्त सडकमा निस्कन्छौ
हैन ए ढलेश्वर
किन यसरी रिसिन्छौ
कहिले त पाइप फुटाउँदै
खानेपानीमै मिसिन्छौ ।

तिम्रै नाममा कतिले डलर झार्या छन्
कतिले यसैमा चिट्ठा पार्‍या छन्
उनीहरू जति धेरै खान्छन्
उति धेरै बसाउँछन्
तिमी त खाली ठसठस गनाछौ
कहिले मूलबाटैमा ह्वात्त आउँछौ
कहिले घरकै धारामा ख्वात्त आउँछौ ।

कहिले नाला भएर बग्छौ
कहिले धारा भएर बग्छौ
कहिले त सानोतिनो बाढी भएर बग्छौ
हैन ए ढलेश्वर !
आफ्नै बाटो हुँदाहुँदै
हाम्रा नेताले बाटो बिराए जस्तो
मर्यादा मिच्ने काम कहिलेसम्म सक्छौ
आफ्नै बाटो सुलुलु जानु नि
किन मापसे जस्तो बेलाकुबेला बाटो छेक्छौं ?
कहिले गल्लीतिर बहकिन्छौ
बहिले चौकतिर छछल्किन्छौ
हैन ए ढलेश्वर !
किन सिधै खोलामा हाम नफालेर
ताल झैं टोलतिरै टल्किन्छौ ?
टुकुचा तिमीलाई पर्खिराछ
धोबीखोला तिमी बिना तड्पिराछ
बागमतीमा तिमी बाहेक अरु झर्दै झर्दैन
बिष्णुमती तिमी बिना एक बित्ता सर्दैन

त्यसैले अब
हे ढलेश्वर !
तिमीले नेताले जस्तो बाटो नबिराएर
सिधै खोलामा नै बग्नुपर्छ
एकदिन
ढलेश्वर हाइड्रो पावर भएर
घरघरमा बिजुली भई बल्नुपर्छ
लोडसेडिङ भन्ने जन्तु
धेरै बस्यो मुलुकमा
यो पनि राजसत्ता जस्तै
चाँडै गर्ल्याम्म ढल्नुपर्छ ।

०००
काठमाडौं