नेपाली हास्यव्यङ्ग्य अनलाइन पत्रिका

फर्सी ठूलो चिरिएर चउरमा झर्‍यो
धेरै फर्सी फलाउनेलाई चिन्ता पर्‍यो ।
फर्सी फुट्यो, जुट्यो भन्छन् भेट्नो भेटिएन
कुहिएको फर्सी किन्दा भित्र हेरिएन ।।

बियाँ सबै चलेका छन् एम्.सी.सी. को चालमा
दुनियालाई पारेका छन् माकुराको जालमा ।
भेट्नोलाई भाँडेका छन् ठेट्नाहरू मिली
झिक्रामाथि देखिएनन् चमेली र बेली ।।

अर्गानिक फर्सी खेती मुलुकमा मासे
प्रकृतिमा नफलेका भए आसेपासे ।
पश्चिमको उज्यालोमा भाले-पोथी बासे
आफ्नो कर्म, संस्कृति र धर्म पनि नासे ।।

गउँत र गोबरमा नहुर्केको बोट
भद्रगोल भण्डारमा थियो निकै खोट ।
कुहिएको फर्सी फुट्यो, फुट्नै पर्ने थियो
युरियाले मौलाएको फर्सी विनामियो ।।

धन्य ईश्वर ! हे परमेश्वरी
फर्सी किन सडेका यसोरी ?

२०७७, फागुन १४
नागार्जुन न.पा.-१, रानीवन, काठमाडौँ
९८४१४९१०८१