नेपाली हास्यव्यङ्ग्य अनलाइन पत्रिका

नरिसाउँनु रिसाइसकेपछि
मुख मात्रै के कालो बनाउँनु
ओठ फर्फराउँनु पर्छ
जीउ थर्थराउँनु पर्छ
आँखा रातो हुनुपर्छ
कान तातो हुनुपर्छ
नरिसाउँनु रिसाइसकेपछि
मुख मात्रै के कालो बनाउँनु ?

माथ्लो दाँतले बेस्सरी किचेर तल्लो ओठ
छर्छरी रगत निकाल्नु पर्छ
तेस्का बाजेदेखि सत्तो फलाकेर
सरापका थाङ्ग्रा हाल्नुपर्छ
मुठ्ठी बटार्नुपर्छ
गोडा फार्नुपर्छ
फट्कारेर अङ्ग प्रत्यङ्ग
अहंकारको धूलो झार्नुपर्छ
नरिसाउँनु रिसाइसकेपछि
मुखमात्रै के कालो बनाउँनु ?

म पनि त रिसाउँन खोजेकै त हो नि
कोप्र्याक पारेर दुनियाँलाई
आत्म संतुष्टिमा
बिसाउन खोजेकै त हो नि
के गर्नु
रिसाउँन पनि पावर हुनुपर्छ
हस हजुरको टावर हुनुपर्छ
त्यसैले रिसाउँने कुनै क्षमता छैन
मेरो जाबो रिसले आखिर क्यै लछार्दैन
तर पनि
नरिसाउँनु रिसाइसकेपछि
मुख मात्रै के कालो बनाउँनु ?

चुनाव सकिएपछि
हार्ने को बजारमा रिसाउँने बात छ
भन्छन् आफूमाथि घात अन्तर्घात छ
शब्दमै मुक्का छ शब्दमै लात छहरू
रिसाउँ यार रिसाउँ
रिसकै चौतारीमा आफ्नू पिर बिसाउँ
टेबल ठोक्नुपर्छ
झोलमाल धोक्नुपर्छ
नरिसाउँनु रिसाइसकेपछि
मुख मात्रै के कालो बनाउँनु ।

गौरादह, झापा