टेको
मक्किए पनि र, लडे पनि बाँसको खुट्टामा हिँड्न बानी परेकाहरू कति सजिलै उभिँदारहेछन्- बाँसे खुट्टामा ।
म सानो छँदा
गाउँका दाइहरू
बाँसका टुप्पा काट्थे
आँख्ला राख्थे
र, तिनै आँख्लामा टेकेर
हिँड्थे, टुकुटुकु ।
कयौँ पटक
तिनै बाँसका खुट्टाहरू चोरेर
हिँड्न खोजेको छु- म पनि
र, कयौँ पटक
लडेको छु- बासँका खुट्टामा नअडिएर ।
देख्दा रमाइलो हुँदोरहेछ
बाँसका खुट्टामा हिँड्न
सुन्दा अनौठो हुँदोरहेछ
बाँसका खुट्टा टेकेर हिँड्नु ।
सर्कसमा बाँसका खुट्टा टेकेर हिँडेको
देखेको छु- मैले
सर्कसमै दर्शकले रमाई रमाई हेरेको
देखेको छु- मैले
बाँसे खुट्टामा बानी पर्नेहरू
कति सजिलै अड्दारहेछन्- टेकोमा
बाँसे खुट्टामा भर पर्नेहरू
कति सजिलै चड्दारहेछन्- टेकोमा ।
बाँसका खुट्टा टेकेर हिँड्नेहरू
सक्दारहेनछन्- भुइँमा खुट्टा टेक्न ।
आज बुझ्दैछु-
आधार नभए पनि
मक्किए पनि
र, लडे पनि
बाँसको खुट्टामा हिँड्न बानी परेकाहरू
कति सजिलै उभिँदारहेछन्- बाँसे खुट्टामा ।
काठमाडौं