आज आफैँसँग सोध्न मन लागेको छ
मैले मित्रता फेरेँ कि उनीहरूले ? आज आफैँसँग सोध्न मन लागेको छ मैले गीत उल्टाएँ कि उनीहरूले ?
हिजो हिँडेको बाटो
ठीक थियो कि बेठीक थियो ?
हिजो फेरेको सास
सुगन्धित थियो कि दुर्गन्धित थियो ?
हिजो देखेको संसार
उज्यालो थियो कि अँध्यारो थियो ?
हिजो गाँसेको मित्रता
नजिक थियो कि टाढा थियो ?
आज आफैँसँग सोध्न मन लागेको छ
हिजो गाएको गीत
सुन्दर थियो कि रद्दी थियो ?
बाटो हिँड्नेहरू हिजोका
आज अर्कै बाटो हिँड्दै छन्
र हिजैको बाटो भन्दै छन्
सास फेर्नेहरू हिजोका
आज अर्कै सास फेर्दै छन्
र हिजोकै सास भन्दै छन्
संसार देख्नेहरू हिजोका
आज अर्कै संसार देख्दै छन्
र हिजैको संसार भन्दै छन् ।
मित्रता गाँस्नेहरू हिजोका
आज अर्कै मित्रता गाँस्दै छन्
र हिजैको मित्रता भन्दै छन्
गीत गाउनेहरू हिजोका
आज अर्कै गीत गाउँदै छन्
र हिजैको गीत भन्दै छन् ।
मैले बाटो बिराएँ कि
उनीहरूले ?
मैले सास बदलेँ कि
उनीहरूले ?
मैले संसार साटेँ कि
उनीहरूले ?
मैले मित्रता फेरेँ कि
उनीहरूले ?
आज आफैँसँग सोध्न मन लागेको छ
मैले गीत उल्टाएँ कि
उनीहरूले ?
हेटौडा