नेपाली हास्यव्यङ्ग्य अनलाइन पत्रिका

साइँला,
ए साइँला
देशमा आइहाल्
साइँला,
अब अलि गम्भीर भएर
सोच विचार गर्

उ बेलाको जति अब
आतङ्क छैन गाउमा
चन्दाआतङ्कहरूका आँखा
अब छन् ब्याजमा र साँउमा
गाउँ दुख गर्नु पर्ने हुनाले
पुगिसके अब गतिला ठाउमा
यसैले-
अलिक कम भएको छ डर
मेसो मिलाएर अब फर्की घर ।
हेर् साइँला,
अपहरण अलि हटेका छन्
सुराकीको बहानामा
बेपत्ता पार्ने काम पनि
अलि घटेका छन्
गाउँमा आतङ्क मच्चाउने पनि
अब सहरतिरै खटेका छन्
ठुला माफियासँगै अटेका छन्
देश बनाउने काममा डटेका छन्
भने हेर् साइँला
अब विदेश नबस्
मेसो मिलाएर देशमै पस् ।

हेर् साइँला
उबेलाका प्रभुका
रेस्टुराँ र बार खुलिसके
दरबारसँग पनि डर कम भो
कमरेटहरू पनि अब खुलिसके
रेस्टुराँतिर झुलिसके
वाराङ्गनातिर भुलिसके
बेला पनि भो नि त
अब फुलिसके।
हेर् साइँला,
अब नगरेको कुरामा
भासिनु पर्ने भास
कम भएको छ
गाउँको त्रास
माथितिरै गएको छ
अब गारो छैन
मात्र पार्टीको झोला बोक्नुपर्छ
जे पनि दिन्छु भनेर
भाषणमा खोक्नुपर्छ
विरोधीलाई ठोक्नुपर्छ
सकेसम्म तिनलाई रोक्नुपर्छ
हेर् साइँला अब आइज
देशले तिमीहरू जस्ता झोले युवक मागेको छ
तिमी जस्तो युवाको जोस जागेको छ
देश उकालो लागेको छ
हेर् साइँला
छिटै देशमा आइहाल्
पार्टीको झोला समाइहाल् ।

भद्रपुर, झापा