गुन्द्रुक म

गुन्द्रुक म

म दिनप्रतिदिन अमिलो बन्दै गएँ खाँदिदै गएँ कहिले आफ्नै शाखा सन्तानले खाँदे खँदारे राज्यका तर्फबाट पनि खाँद्यो खँदार्‍यो ।

गुन्द्रुक बनाउन धरामा मिलाए
म गुन्द्रुक योग्य कलिलो साग बने
सागले जति सुख पाए पनि उसको अन्तिम जुनी नै गुन्द्रुक
खाद्ने खँदार्ने क्रम सुरु भयो
माक्कमुक्क पाक्कपुक्कको दैनिकी पचाउन सिकें
आफन्त इस्टमित्रले खाँदे खँदारे
म हजार हण्डर खाँदै बज्र शालीग्राम खन्न लागेँ
जब गज्जबको साग तुलिएँ
अनि श्रीमतीबाट खाँदिन सिन्की बन्न लालायित भएँ
मेरो ताल देखेर कसैले गाई भने त कसैले गोरु
भार्याले हरकाणेबाट गुन्द्रुक बनाउन अथक प्रयत्न गरिन्
ससुराली सबैले गुन्द्रुक बनाउन आनन्द माने
म दिनप्रतिदिन अमिलो बन्दै गएँ खाँदिदै गएँ
कहिले आफ्नै शाखा सन्तानले खाँदे खँदारे
राज्यका तर्फबाट पनि खाँद्यो खँदार्‍यो
छिमेकी इस्टमित्रले फुटेका खस्रा बाङ्गा बाङ्गा खुट्टाले खाँदे
बोली बचन र व्यवहारले खाँदे
बक्सिन, मुड्की, हत्केला र कुर्कुच्चाले खाँदे
सज्जन दूर्जनले गक्ष्य र लक्ष्य अनुसार खाँदे
शरीरमा भएको जिवीतांशको सारा अवयवलाई ध्वस्त पारे
थिची थिची बटारी बटारी रस निखारे
मेरो आत्माको अस्तित्व नष्ट गर्न
टन्टलापुरे घाममा बिस्कुन सुकाइयो
वस्तुको अस्तु र अस्तित्व बदल्न
पाँच सात दिन खाल्डामै खँदारेर राखे
ढुङ्गा सिलौटा र लोहोराले थिचे
लक्ष्यमा पुगेको ठानेर हो क्यार
ढक्कन खोलेर सुँगे सुम्सुम्याए र चाटे
मत ग्रहणयोग्य स्वादिष्ट जिब्रो पड्किने गुन्द्रुक भएछु ।