नेपाली हास्यव्यङ्ग्य अनलाइन पत्रिका

समय मौन छ
र, यतिखेर ऊ
शिशुहरूको आँखामा बसेको छ ।।

बोल्न नसक्नु पनि
एउटा भयङ्कर विद्रोह हो ।
रोइ दिनु
र, भोकको गीत गाई दिनु
अर्थात् हाँसी दिनु
र, शान्त मनमा रमाइ दिनु ।।

अहिले समय शान्त छ
नसम्झ समय निदाएको छ ।।

खबरदार चेपेमा बगेकी आमाहरू
देश निद्राबाट उठ्यो भने
र, शिशुले जस्तै चिच्यायो भने
सम्झनु समय महान विद्रोहको तयारीमा छ ।।

यतिखेर समय चुपचाप
नानीहरूको आँखामा बसेको छ
र, आमाहरू हो
यतिखेर देश लोरी गाइरहेछ ।

(नोटः चेपे भन्नाले दुई राजाको अहङ्कार मास्न र देश बचाउन चेपे नदीमा राजमाताले दूध बगाएकी थिइन् । र, त्यही नदीमा आत्मदाह गरेकी थिइन् ।)

दमक, झापा