नेपाली हास्यव्यङ्ग्य अनलाइन पत्रिका

प्यारा हौ मतदान गर्नु यसमा हो चिन्ह यो बोतल ।
खाली छैन भरेर राख्छु सहजै निर्लज्जताको फल।।
नेता बन्छु बनाउँछौ यदि भने लौ कार्यकर्ता भन ।
आफैं गर्छु विकास पिन्छु जल यो झोले तिमी नै बन ।।
१
नारा,भाषण गर्छु हास्य रसका सुर्काउँदै पाखुरा ।
तिम्रै आगन छेउ पुग्छ सजिलै बेंसी तथा टाकुरा ।।
बाँचौला सब साथमा मिलिजुली पारी धरा सुन्दर ।
आफैं झर्छ गिलास भर्छ जलले रोक्ने यहाँ को छ र ।।
२
यो नेपाल विकासको पथलिई जाँदैछ केही पर ।
मेरो चिन्ह चुनाव बोतल भयो माया मलाई गर ।।
सैयौंका घर,खेत ,बाग लुटियो नारा उचाली कन।
कस्को नोकर खै बने म बबुरो आक्रोश पाली झन ।।
३
झोले, दास बनाउँदै छ दलले आफन्त छानी फसे ।
बोकौ बोतल यो छ सोम रसको साक्षी किनारा बसे ।।
टोपी माग्छ म दिन्न है बुझ सखे बाँडेर सारी बसे ।
मेरो बोतल योग्यता बुझ तिमी फाँडेर बारी सखे ।।
४
अर्को बोतल मोजमा छ अहिले खोजेर खै बस्छ को ।
मेरो यो गणतन्त्र नाम धमिरा रोजी सबै डस्छ यो ।।
तिम्रा हर्कतले बनेछु म दुखी तातो खरानी घसे ।
आफैं चित्त बुझाउँदै मुलुकमा माया नमारी बसे ।।
५
मेरो बोतलमा छ शक्ति कतिको ढेवा र पाखण्डको ।
बेची देश सबै म शासक बने आफन्त वा झुन्डको ।।
चिन्दैनौ किन खै चिनाउँ कसरी बेची बसे देश के ।
आफू बाँच्छु म मार्दथे जन सबै ताकी बसे ठेसले ।।
६
झोले झुन्ड मिली बसे मुलुकमा पापिष्टको जीतले ।
हाँस्थ्यो खै भमरा कहाँ र कसरी जाडो तथा शीतले ।।
दागैदाग छ बागमा मलिनता के पुष्प यो दाग हो ।
मेरो बोतलमा छ निर्मलपना के चेतना बाग हो ।।
७

पाटन नगरपालिका वा.न.२
सिलंगा,बैतडी