नेपाली हास्यव्यङ्ग्य अनलाइन पत्रिका

जग्गा जमिन धरो थेन खुर्सानीको बारी
अहिले भने डल्लु कपन नैकाप सल्लाघारी
महिनैपिच्छे विदेश भ्रमण चिल्लो छ सवारी
मेरो पनि नमस्कार है मिस्टर भ्रष्टाचारी ।

हिजोसम्म नामर्द छ भन्थे ज्वाईं छुसी
घुस खान थालेपछि ससुराली खुसी
तिम्रै नै छ मालामाली वारिदेखि पारि
मेरो पनि नमस्कार है मिस्टर भ्रष्टाचारी ।

गणतन्त्रवादीहरुको साथ पनि तिमी
राजतन्त्रवादीहरुको हात पनि तिमी
तिम्रो सँगत सवै पार्टीसंग हाराहारी
मेरो पनि नमस्कार है मिस्टर भ्रष्टाचारी ।

भ्रष्टाचारले आक्रान्त छौं भन्ने पनि तिमी
भ्रष्टाचारकै भित्री कारक बन्ने पनि तिमी
अर्कैलाई औंल्याइ हिंड्छौ भाका सारीसारी
मेरो पनि नमस्कार है मिस्टर भ्रष्टाचारी ।

घाम छन्जेल सवैजाना तिम्रै विरोध गर्छन
साँझ फेरि शिखर साँझमा तिम्रैसामु पर्छन
दरबारजस्तै घर जख्यौ बैंक वचत भारी
मेरो पनि नमस्कार है मिस्टर भष्टाचारी ।

तिम्रै प्यारा व्यापारीछन् ठेकेदार नेता
कालो कर्तुत गरे पनि पूँजी बन्छन् सेता
माल अड्डा भन्सार अड्डा सँधै हाराहारी
मेरो पनि नमस्कार है मिस्टर भ्रष्टाचारी ।

मन्त्रीजीका नातागोता ज्वाईं जेठान तिमी
नेताजीका भन्छा बैठक उठान बैठान तिमी
पार्टी पनि मौका मिलाई फेर्छौ चारीचारी
मेरो पनि नमस्कार है मिस्टर भ्रष्टाचारी ।

खरिद बिक्री कोटेसनमा कमिसनको जालो
जहाँजहाँ मौका पर्छ त्यहीं तिम्रो पालो
नेताजीको चाकरी छ दैलो कोठेबारी
मेरो पनि नमस्कार है मिस्टर भ्रष्टाचारी ।

गौरादह, झापा